Zuhaitzen Ibilbideko parte hartzaileak udaletxe osteko zelaian.
Zuhaitzetik zuhaitzera herriko natur ondarearen zatitxo bat ezagutzeko aukera izan zuten joan den domekan Markina-Xemeinen zehar egin zen Zuhaitzen Ibilaldian parte hartu zutenek. Uhagoneko hagina, Xemeingo artea, Lea-Artibai Ikastetxeko gorostia eta sekuoia, udaletxe osteko ginkgoa, haritza eta gaztainondoa, Goiko Portaleko haritza, Zelaiko ezkia eta Arkupe aurreko artea ikusi eta bakoitzaren ezaugarriak entzun zituzten adi adi. Gainera, bakoitzari bere plaka jarri zioten beste herritar guztiek ere herriko zuhaitzen barri jakiteko.
10:00etan hasi zen ibilbidea Arkupean, eta Ekozaingo arduradunen azalpenak entzunda lehenengo zuhaitza ezagutzera abiatu ziren ume, gazte eta nagusiak.
Uhagoneko haginak 20 metroko altuera hartu dezakeela jakin zuten partaideek, Xemeingo arteak, berriz, arantzak dituela defendatzeko, eta garai batean, Xemeingo ingurua artaz betea zegoela ere bai. “Frantsesak ailegatu zirenean moztu zituzten guztiak, geratzen den hau da zegoenaren adibidea”, azaldu zuten Ekozaingoek.
Lea-Artibai Ikastetxera sartzeko arazo txiki batzuen ostean, gorostiaren aurrean zegoen jende multzoa, gehiago jakiteko prest. Bere bolatxoak toxikoak omen dira pertsonentzat, ez ordea txorientzat. Eurak elikatu egiten dira bolatxoekin. Egur gogorra daukate eta 1.000 urte ere hartu dezaketela aitatu zuten.
Sekuoiak, ostera, altuera handia hartu dezaketela zehaztu zuten, “Xemeingo elizaren pareraino”.
Udaletxe osteko zuhaitzak
Lea-Artibai Ikastetxetik udaletxe osterako ibilaldia egin zuten. Ginkgoa ikusi zuten lehenengo, Txinan bakarrik mantendu den zuhaitz sakratua. Ondoko haritz amerikarra ikusi zuten gero, eta azkenik alboko zelaian dagoan gaztainondoa. “Artoa eta patata ekarri aurretik gaztainak guretzako elikagai garrantzitsua ziren”, azaldu zuten.
Goiko Portaleko haritzari jarri zioten plaka, gero. Amerikaren konkistan itsasontziak egiteko erabili omen zen haritzaren egurra, eta beraz, asko desagertu ziren. “Euskaldunontzat ikur bat da; batzarrak eta epaiketak egiten ziren herri eta auzoetan zhaitz honen ondoan”.
Zelaia zeharkatu eta beheko partean dagoen ezkiaren ezaugarriak azaldu zituzten Ekozaingoek. Uztailean markina-xemeindarrei horren ezaguna egiten zaien usaina dario. Usain horrek, erleak erakartzen ditu.
Ibilaldia, hasi zuten lekuan amaitu zuten: Arkupean. Jarrilekuari gerizpea egiten dion Artiari ere plaka jarri zioten ume eta gazteek.
Eta eguna goxo amaitzeko, hamaiketakoa egin zuten, gainera, Artiaren ondoan.
[nggallery ID=228]
