Goian, Naiara Goenaga eta Itziar Sanchez, eta, behean, Ane Alberdi eta Nahia Elezgarai, Txantxangorriko begiraleak
Mutrikuko
Txantxangorri Aisialdi Taldeak goi-goitik ospatu nahi du bere urteurrena, eta horretarako herritar guztiak bihar [apirilak 18] egingo dute jaian parte hartzera gonbidatu dituzte. “Gaba Beltzean gurasoek eurei begira zerbait egin behar genukeela eskatu ohi digute, eta biharkoa horretarako aukera aproposa da”, nabarmendu dute begiraleek.
Urteurren berezia ospatze aldera, herria gorriz jantzi nahi dute; elastiko gorriekin eta pailazoen sudur gorriekin jantzita irtengo dute begirale guztiek.
Kanta berri eta guzti
Begirale guztiak jaiarekin gozatzeko irrikaz daude. “Polita izango da herritar guztiak bertan batzea”. Udaletxeko balkoitik txupinazoa botatzen hasiko dute eguna. Txapligua botatzearekin batera, egun berezirako prestatu duten kantua estreinatuko dute. Ondoren, iluntzera bitartean jaiak ez du etenik izango.
Txantxangorri aisialdi taldeko kideak
Bazkal aurretik argazki erraldoia aterako dute Goiko Plazan eta jarraian, Merkatu Plazan bazkaritan batuko dira gaurko eta lehengo begiraleak herriko umeekin batera: “78 ume eta 60 nagusik eman dute izena”.
Arratsaldea jolasean eta dantzan ibili eta gero, eguna Disko festarekin amaituko dute. Begiraleek jarriko dute musika eta “giro aparta” sortzea da euren asmoa. Irteeretan dantzatzen dituzten hainbat kantu ipiniko dituzte, eta
Irri Irri Txantxangorri eta egunerako bertarako prestatu duten kantua ez dira faltako. “Koreografia berezia prestatu dugu, eta gure asmoa herri guztia dantzan ipintzea da”.
EGITARAUA
- 10:45. Udaletxeko balkoitik txupinazoa.
- Ondoren, herriko txistulariek lagunduta, erraldoi eta buruhandien kalejira.
- 12:00. Zezen txikiak, Goiko Plazan.
- 13:45. Argazki erraldoia, Goiko Plazan.
- 14:00. Herri bazkaria, Merkatu Plazan.
- Jarraian, txarangak giroturiko jolasak Txantxangorriren eskutik.
- 17:30. Irrien lagunen Egin irri ikuskizuna, Zabiel Plazan.
- 18:30. Trikitilarien kalejira.
- 19:00. Disko festa, Beheko Plazan.
