Geoparkeen Astea ospatuko dute Mutrikun, Deban eta Zumaian
Euskal Kostaldeko Geoparkeak aurten ere Europako Geoparkeen Astea ospatuko du. Maiatzaren 22an hasi eta maiatzaren 31ra bitartean, ia egunero askotariko jarduerez gozatzeko aukera egongo da.
Geoparkearen Asteak Mutrikuko, Debako eta Zumaiako ondare natural, geologiko eta kultural baliotsua herritarrei gerturatzea du helburu nagusi. “Egitasmo hau bosgarrenez egingo da gurean, eta Europako geoparke guztietan ospatzen da aldi berean”.
Euskal Geoparkea osatzen duten hiru herrietan hainbat ekimen egingo dira. Mutrikuri dagokionez, lehenegoa domekan egingo da. Karsteko Zaporeak deritzon bisita gidatua doan egiteko aukera eskainiko du Geoparkeak. Horrez gain, maiatzaren 30ean Mutriku Mariñela irteera gidatua egingo da.
Irteera gidatuez gain, “hitzaldi mamitsuez” gozatzeko aukera ere ere ekarriko du Geoparkearen asteak. Horietan aipagarriena Xabier Orue-Etxebarria EHUko Paleontologia Katedradunak maiatzaren 26an Zabiel Kultur Etxean eskainiko duen Euskal labeak Geoparkean hitzaldia izango da.
Azkenik, maiatzaren 29an Txio-txioka, Geoparkeko hegaztiekin ezkutaketan 6 eta 10 urte bitarteko haurrei zuzenduriko “tailer dibertigarria” egingo da Luardo Etxean. Bi orduz inguruko hegaztiak jolasaren bitartez hobeto ezagutzeko aukera eskaniko du tailerrak.
Horietan eta beste hainbat ekimenetan parte hartzeko Mutrikuko, Debako eta Zumaiako Turismo Bulegoetara jo beharko dute interesatuek. Informazio gehiago nahi izanez gero, Euskal Geoparkeko webgunea kontsultatu daiteke.
Geoparkeen astea-ekitaldiak
Karstaren ibilbidea. Argazkia: Euskal Geoparkea
Xabier Orue-Etxebarria EHUko Paleontologia Katedraduna Mutrikuko Zelaitzueta labearen aurrean
