Herriko lokal hutsen zerrenda egiten ari dira Lekeitioko Udala eta Lea Artibai Garapen Agentzia
Helburua lokalen beharrezko informazioa jasota izango duen inbentario bat egitea dela azaldu du udalak. “Hala nola, lokalaren tamaina edota jabearen kontaktua eta horrela Lekeition jarduera ekonomiko bat hasteko erraztasunak emateko”.
Hutsik dagoen Lekeitioko lokal bat. Argazkia: Lekeitioko Udala
Azken bost urteetan Lekeitioko Udala eta Leartibai Garapen Agentziak lagunduta 43 enpresa berri jarri dira martxan Lekeition eta 54 lanpostu sortu dira. Aurten aldiz, Lekeitioko Udala eta Leartibai Garapen Agentziak lagunduta 11 jarduera ekonomiko eman dira altan, eta beste zortzi proposamen lantzen dabiltzala jakitera eman dute. “Tamalez, arrazoi ezberdinengatik zortzi jarduera ekonomiko bertan behera gelditu dira”.
Udalak ikusi duenez, Lekeition jarduera ekonomiko bat martxan jarri nahi duten pertsonek dauden lokalen inguruko informazio falta handia dute eskuragarri eta horrek atzera botatzen ditu asko. “Ekintzaile hauei bidea errazte aldera, dagoeneko aktibitate ekonomikoa eduki eta gaur egun itxita dauden 93 lokal zerrendatu ditugu”, azaldu du udalak. Orain, lokal itxi horien jabeekin harremanetan jartzen hasi dira, proiektuaren berri eman eta euren lokalen informazioa jasotzeko. Behin zerrenda eginda, interesatuak udalera jo ahal izango dute informazio eske. “Proiektu honegaz herriko jarduera ekonomikoa bultzatu nahi dugu, alde batetik Lekeition lan eta bizi egin nahi dutenak babestuz eta bestetik kaleen bizitasun komertziala berreskuratzeko pausuak emanez”.
Merkatu plazako postuak
Herrian zehar dauden lokalez gain, merkatu plazan ere zazpi salmenta postu libre daude ekintzaileentzat. Beheko solairuan, postuaren tamainaren arabera 44,90eurotatik 89,92eurotara balio du postua jartzeak hilabetean. Ekoizleentzat aldiz, goiko pisuan, 0,95 euro balio du mahai erdia hartzea egunean edo 5,70 euro hilabetean.
Lokal hutsen inguruko informazio gehiago jasotzeko edo merkatu plazako postuen berri jasotzeko udaleko Garapen Ekonomikoko Sailagaz jarri behar dute harremanetan interesdunek, Sabino Arana kaleko 14. zenbakira hurbilduz, 94-603 41 11 telefono zenbakira deituta edo xgabiola@leartibai.com helbide elektronikora idatziz.
