Gernika «hazi araztea» dute xede Euzko Abertzaleek eta EAJk
Gernikara eta Bizkaira jarduera ekonomikoa eta enplegua ekarriko dituela esan zuen Rementeriak. Helburua herria biziaraztea dela esan zuen GorroñokEuzko Abertzaleek eta EAJk sortu duten koalizioak Gernika «hazi araztea» du helburu, asteleheneko ekit...
Gernikara eta Bizkaira jarduera ekonomikoa eta enplegua ekarriko dituela esan zuen Rementeriak. Helburua herria biziaraztea dela esan zuen Gorroñok
Euzko Abertzaleek eta EAJk sortu duten koalizioak Gernika «hazi araztea» du helburu, asteleheneko ekitaldian esan zutenez. Bizkaiko ahaldun nagusigai Unai Rementeriak egin zituen adierazpenok, Foru plazan batu zen jendearen aurrean.Urdaibaiko hiribilduan, «bere etxean» dela esan zuen mundakarrak, eta askatasunen eta bakearen sinboloa den herrian, bonbardaketa izan zuen gogoan. «Ezinezko egiten zait gure amona eta aitonek sufritu zutena ez irudikatzea».
Gernikak errautsetatik birsortzeko kemena izan duela aipatu zuen, eta gaur egun ere, horretarako ahalmena izango duela aipatu zuen, ekonomiari aipamen eginez. «Hitza ematen dizuet Gernikara eta Bizkaia osora jarduera ekonomikoa eta enplegua ekartzeko ahalegina egingo dudala, eta oinarrizkoetatik hasi gara. Gure indarrak batzea izan da lehen urratsa. Horregatik, Jose Mari Gorroño eta EAJ elkarrekin goaz, elkarrekin indartsuago garelako».
Sare industriala suspertu nahi duela esan zuen atzoko mitinean; «hau ez da esperimentuetan aritzeko momentua. Txarto dagoena hobeto egotea bilatzeko konpromisoa hartzen dugu».
Trena martxan jarri
Jose Mari Gorroñok ere parte hartu zuen asteleheneko ekitaldian, eta hark ere ekonomia izan zuen hizpide. Hurrengo lau urteak garrantzitsuak izango direla esan zuen. «Pertsonak, eta herri hau, gauza guztien gainetik daude. Horregatik sortu da Euzko Abertzaleak eta EAJren arteko koalizioa». Lehenengo helburua herria biziaraztea dela esan zuen alkategaiak, indarrak batuz. «Trena martxan jarri behar dugu, ekonomia suspertzeko eta enplegua sortzeko», esan zuen.
Batasun eraginkorra
Euzkadi Buru Batzarreko presidente Andoni Ortuzarrek ere parte hartu zuen, eta berak ere koalizioaren garrantzia azpimarratu zuen: «Gernika-Lumorentzat ona da, baita Bizkaiarentzat ere». Ortuzarren arabera, «Gernikak izan behar du herri honentzat nahi dugunaren isla». Gorroñok bultzatutako zerrendaren eta EAJren batasuna positibotzat jo zuen: «Eraginkorragoak izango gara, eta Gernikak distira egitea lortuko dugu».
