Ondarroako Gaztetxearen urteurren ospakizunak giro onean hasi dituzte
Aurreko asteburuan hasi zituzten Ondarroako Gaztetxearen 25. urteurren jaiaren ospakizunak. Gazte Asanbladako kideek nabarmendu dutenez, gainera, giro “oso ona” egon zen zapatuan [maiatzak 16]. “Irakurketa oso positiboa egiten dugu. Herriak oso erantzun ona eman zuen, eta gustura geratu gara. Horrelako egitarau oparoa antolatu eta gero pozik daude jendeak eman duen erantzunagaz”.
Ospakizunen lehen eguna Sakatu Elektrotxarangak girotuta hasi zuten. Eguerdiko poteoa egin bitartean, txarangak sekulako giroa ipini zuen kaleetan zehar. Ostean, eguraldia lagun, bazkaritan batu ziren Gaztetxearen aurrean. “Sekulako zaparrada egingo zuela pentsatzen genuen, baina arratsaldera arte ateri mantendu zuen. Arazorik gabe egin genituen ekimen guztiak”.
50 pertsona inguru batu ziren bazkaritan, eta Gazte Asanbladako kideen iritziz arrakastatsua izan zen. “Orokorrean dena ondo joan zen. Pila bat jende batu ginen; hiru mahai jendez bete ziren. Oso anitza izan zen bazkaria. Oraingo gazte asanbladako kideez gain, lehen asanbladan ibilitako hainbat kide ere gurekin egon ziren. Azkenean, adin guztietako jendea batu ginen”.
Bazkalostean egin ziren jokoetan ere, jende asko batu zen. Match inprobisatzea egin ez bazuten ere, beti-betiko jokoetan denbora luzez ondo pasatzeko aukera izan zuten. “Jendea sekulako gogogoaz ikusi genuen, eta ondo ibili ziren”.
Zapatuari dagokionez, eguna kontzertuekin amaitu zuten. Gaztetxean batu zen jendeak ordu txikiak arte musika erritmo desberdinez gozatzeko aukera izan zuen. “Giro polita egon zen, eta denok oso gustura egon ginen”.
Jai egun handiena aurreko zapatuan izan bazen ere, hurrengo egunetara begira ere hainbat ekimen dituzte antolatuak.
EGITARAUA
Sakatu elektrotxaranga Ondarroako kalean girotzen. Argazkia: OGA
Bazkalondoko jolasak. Argazkia: OGA
- Eguena [maiatzak 21]
- 19:00etatik aurrera, pintxo poteoa Gaztetxean.
- Barikua [maiatzak 22]
- 17:00etan, Gaztetxearen 25 urteko bilakaeraren mahai ingurua.
- 21:30ean, gabeko mendi buelta.
- Zapatua [maiatzak 23]
- 17:30etik aurrera, herriko musikarien eta bakarlarien kontzertuak: Kemen Lertxundi, Baba, Mor More, Possexus, Jake mate, Asmo txarrak, Utopik, Crazy Chaos, Katekesise, Txibi korañak… eta askoz gehiago
- 20:00etatik 22:00etara, Gaztetxe kanpoan ogitartekoak egongo dira.
