Abarka antzerki taldeak 'Abarka Shortak' estreinatuko du Markina-Xemeinen
Azken aldian entzutetsu bihurtzen hasi diren mikro antzerkietara jauzia eman du Abarka antzerki taldeak. Biba Zorrixen Izurritie antzezlanaren ondoren formatu txikiko antzezpenak prestatu ditu Markina-Xemeingo taldeak. Gaur estreinatuko dute Abarka Shortak proiektu berria Uhagon kulturgunean. Antzerki bakarra barik, hiru mikro antzerki izango dira oraingoan. 15 eta 20 minutuko hiru obra dira: Konposta operazioa, Hilean behin eta Spagarroza.
Zer edo zer erraza egitea zuten asmoa, baina, «betiko modura» ideiak kateatzen eta egitasmoa korapilatzen joan zitzaien Abarka antzerki taldekoei. Zer edo zer euren kabuz eta talde txikietan egitea erabaki zuten, eta horrela, hiru taldetan banatu dira, eta hiru antzezpen labur prestatu dituzte. Gidoiak Abarkakoenak dira, talde bakoitzan berea pentsatu du; azken ikutuak egiteko baina, Ander Lipus aktore eta zuzendariaren laguntza izan dute.
Hiru antzezpen eta hiru gune dira. Ikuslea izango da baina, mugituko dena antzezpenak ikusteko. Horrela, ikusleak Uhagon kulturgunera joaten direnean talde ezberdinetan banatuko dituzte: gorriak, urdinak eta berdeak. Gidari batek zuzenduko ditu taldeak dagozkien gunera. Ikusle bakoitzak hiru obrak ikusiko ditu, baina, txandaka,bata bestearen ostean. Hau da, lehenengo bata, gero bestea eta azkenik hirugarrena. Emanaldi batetik bestera, Uhagoneko kafetegian batuko dira ikusleak hurrengo antzezpenera joan aurretik. «Ez da galtzeko arriskurik egongo, gidari batek eramango du publikoa dagokion lekura».
Abarkakoek, hiru bidar egingo dute antzezpena gela edo gune berean, publiko ezberdinarekin. Ikusleak jartzeko aukera izango dute. Izan ere, gune bakoitzean 50 bat jarleku ipiniko dituztela aurreratu dute Abarka antzerki taldekoek, eta behar balira eta lekua badago bai eta gehiago ere.
15 minutu inguruko ikuskizunak dira hirurak, umorez eta dramaz jantziak, eta bata eta bestearen artean guztiz desberdinak. Horrelaxe izaten dira mikro antzerkiak, gune txikietan eta publiko gutxi bateri zuzendutako antzezpenak. Ikusleak hurre-hurre izaten ditu aktoreak, eta beraz, obrak ikusi eta bizi egingo dituzte Uhagonera joango direnek; Emozioa biderkatu egingo da.
Aforo mugatua
21:30ean hasiko dira antzezten, baina era horretako antzerkien berezitasuna dela eta, kulturgunean aurretik egotea gomendatu dute Abarkakoek. Sarrera dohanekoa izango da, borondatearen truke, publikoak nahi duena utzia ahalko du.
Antzezpenak gune txikietan izango direnez, kopurua mugatua izango dela ere ohartarazi dute antzerki taldekoek. Guztira 150 bat lagunentzako lekua egongo da, eta sarrerak aldez aurretik hartu ahal dira Uhagon kulturgunean bertan. «Gaurko ere gorde ditugu batzuk, baina ez dira asko izango».
Markina-Xemeingoagaz gain, beste emanaldi batzuk ere aurreikusita dituzte Abarkakoek. Ekainaren 7an Azkoitian egongo dira eta ekainaren 19an Oreretan.
Abarka antzerki taldeko aktoreak Biba zorrixen izurritie! antzezlana entsegatzen.
‘Spagarroza’ izeneko antzezpenaren irudia. Argazkia: Abarka
