Eguzki sukaldeak zertarako erabaliko diren aurkeztu dute Ondarroan
Ondarroako Institutuko DBH 2ko 56 ikasleek bi hilabete luzez energia berriztagarrien inguruan egindako proiektua ezagutara eman dute.
EITBk Iurretan zuen egoitzako antena paraboliko zaharrekin eguzkiagaz berotzen diren hiru erretegi prestatu dituzte, eta horiez gain, hamabost labe ere prestatu dituzte.
Ikasleek egindako zientzia proiektua gainera, solidarioa ere bada. Izan ere, egindako erretegi eta labe guztiak Malira eta Senegalera bidaliko dituzte Urko Punta Gobernuz Kanpoko Erakundearen bidez.
Hain zuzen ere, atzo egindako aurkezpenean Urko Punta Gobernuz Kanpoko Erakundeko bi kide proiektua eta haren emaitza bertatik bertara ezagutzen egon ziren. Jesus Martinez erakundendeko misiolariaren iritziz, elektrizitaterik ailegatzen ez den herrixketan onuragarriak izango dira ikasleek egindako eguzki sukaldeak. «Modu horretara, bertan bizi diren herritarrei erraztasunak emango dizkiegu».
Datorren urtean ere bai
Aurkezpenagaz batera hainbat adituk parte hartu zuten mahainguru bat ere egin zuten atzo dozenaka ikasleekin batera. Denek ere, interes handiagaz entzun zituzten batak zein besteak esandako gauzak.
Institutuko arduradunek nabarmendu dutenez, gainera, datorren ikasturtean ere antzerako proiektua egiteko asmoa dute, baina planteamendu desberdinagaz.
Aurten Gizarteko eta Teknologiako irakasleek bultzatutako eta erabakitako eran egin da proiektua, baina datorren urtean ikasleek eurek egin beharko dute dena, era autonomo batean. «Oraingo honetan gauza askotan guk lagundu diegu, baina datorren ikasturtera begira, dena euren esku uztea interesgarria izango litzateke. Guk beharra gainbegiratu, eta behar dutenean lagundu egingo diegu, baina dena eurek kudeatu beharko dute. Ikasteko beste era planteatzen dugu; duten baliabideekin dena egiten posible izatea».
[nggallery ID=249]
Ondarroa BHIko ikasleak, eguzki sukaldeak martxan jartzen
