Gure Esku Dagoren I. Bandera jokatuko da ekainaren 14an, Lekeition
Egun gutxi geratzen dira ekainaren 21erako, baina, azken luzean sartu aurretik azken ziabogan emango du buelta Gure Esku Dagok. Ekainaren 14an izango da hori, egun horretan, Gure Esku Dagoren I. Bandera jokatuko da Lekeition.
Gaur goizean aurkeztu dute bandera Isuntza Arraun Taldeko elkartearen aurrean Angel Oiarbide Gure esku Dagoren bozeramaileak, Edriga Aranburu Isuntza Arraun Elkarteko ordezkariak, Maitane Larrauri Lekeitioko alkateak, Isuntzako arraunlariek eta Gure Esku Dagoren batzordeko kideek. Gure Esku Dagoren bandera esku artean eman zuten estropadaren berri.
Estropada
ACT mailako, ARC1 ligako eta ARC2 ligako 31 traineruk hartuko dute parte Isuntza Arraun Elkarteak antolatuko duen estropadan. Bost traineru izango dira emakumezkoenak eta 26 gizonezkoenak. Danetara Bizkaiko eta Gipuzkoako 28 talde egongo dira Lekeition: Arkote, Arraun Lagunak, Bizkaia, Busturialdea, Deustu, Donostiarra, Getaria-Zarautz-Getaria, Getxo, Hibaika, Hondarribi, Iberia, Isuntza, Kaiku, Lutxana, Mundaka, Ondarru, Oiartzun, Orio, Portugalete, Raspas, San Juan, San Pedro, Santurtzi, Trintxerpe, Urdaibai, Zarautz, Zierbena eta Zumaia.
11:00etan hasiko da estropada emakumezkoen erlojuz kontrakoagaz. Ondoren gizonezkoen erlojuz kontrakoa egingo dute 14 traineruk, eta azkenik, gizonezkoen tandak hasiko dira. Lau traineruko hiru tanda egingo dituzte Lekeitioko uretan 12 traineruk, eta tandak osatzerakoan iazko sailkapenak hartuko dituztela kontuan azaldu dute Isuntzakoek.
Estropada amaitu ostean, Independentzia plazako kioskoan emango dituzte banderak Gure Esku Dagoren kideek emakumezkoen eta gizonezkoen traineru irabazleei.
Arraun, denen artean
Kirol ekintza ezberdinen aurkezpena Bilbon egitekotan zen Gure Esku Dago. Baina, estropada sasoia izanda eta ia arraun talde guztiak Lekeition egiten den banderan batzen zirela eta, arraunarena Lekeition egitea proposatu zuten Isuntza Arraun Elkartekoek. Lekeitioko 37. Bandera izango da beraz, aurtengoa, baina bai eta ere Gure Esku Dagoren I. Bandera.
Estropada antolatzeko Isuntza Arraun Elkarteak Lekeitioko Udalaren laguntza edukiko du. Udalak herrian horrelako ekintzak antolatzea pozgarritzat jo du, elkarte desberdinen arteko elkarlana sustatuz eta herriari eskaintza eginez.
Arraunak eta Gure Esku Dago ekimenak antzekotasun handia daukatela adierazi du Gure Esku Dagok. «Denok arraun egin ezean, ezingo baitugu aurrera egin, behar denean ziabogetara heldu, eta helmugara iritsi». Arrauna, eta Gure Esku Dago talde lana direla azaldu dute. «Borondate anitzek osatzen dute gure trainerua, eta traineru berean goaz helmugara arte. Traineru berean sartu, eta erabaki nahi duen herri bat elkarlanean jartzea lortuz gero bidearen lanerditan izango gara berehala.
Gure Esku Dagoren I. Banderaren aurkezpena. Aurkezpenean egon dira: Angel Oiarbide Gure esku Dagoren bozeramailea, Edriga Aranburu Isuntza Arraun Elkarteko ordezkaria, Maitane Larrauri Lekeitioko alkatea, Isuntzako arraunlariak eta Gure Esku Dagoren batzordeko kideak.
