Martin Alberdi musikaria omenduko dute zapatuan, kontzertu bereziagaz
Lau abesbatzek, hiru orkestrak eta hiru musikarik hartuko dute parte Markina-Xemeingo Xemeingo Elizan izango den omenaldian. Musika estilo ezberdinak eskainiko dituzteBi ordu inguruko kontzertu berezia prestatu dute Xemein Abesbatzak eta Xemeingo Parro...
Lau abesbatzek, hiru orkestrak eta hiru musikarik hartuko dute parte Markina-Xemeingo Xemeingo Elizan izango den omenaldian. Musika estilo ezberdinak eskainiko dituzte
Bi ordu inguruko kontzertu berezia prestatu dute Xemein Abesbatzak eta Xemeingo Parrokiak Martin Alberdi musikaria omentzeko. Markina-Xemeingo koral eta abesbatzez gain, beste herri batzuetako taldeak ere gonbidatu dituzte zapatuan, 18:00etan, Xemeingo Elizan egingo den omenaldia. Danetara, bederatzi talde eta musikarik hartuko dute parte omenaldian: Xemein Gazte Ahots Abesbatzak, Berritxuko Eliz Koruak, Mikel Ansolak, Emeki Koralak, Aitor Oleak, Unanue Udal Musika Eskolak, Jabier Ituartek, Durangoko Herri Maite Soinu Orkestrak eta Xemein Abesbatzak.
Organoa, abesbatzak, orkestra… musika estilo ezberdinak eskainiko dituzte kontzertuan, eta musikari eta abeslariak hobeto ikusi ahal izateko erretaula aurrean pantaila erraldoi bat ere jarriko dutela jakitera eman dute Xemein Abesbatzekoek. «Orkestrak talde handiak dira, eta abesbatzak altara nagusiko eskaileratan abestuko dute».
Emanaldia
Xemein Gazte Ahots Abesbatzagaz hasiko da omenaldia. Gazteek hiru kanta abestuko dituzte Itxaso Jaioren zuzendaritzapean: Zu zaitut alboan, Ixil ixilik eta Behin batian Loiolan. Garbiñe Berikuaren zuzendaritzapean eta Angel Arriola organo jotzailearen doinuekin lagunduta abestuko du ondoren, Berriatuko Eliz Abesbatzak. «Martin Alberdigaz hartu-emana izan zuen taldeak, eta omenaldian parte hartuko dute», azaldu dute Xemein Abesbatzekoek. «Hiru kanta abestuko dituzte, tartean Martin Alberdik irakatsitako bat».
Musika estiloa aldatuta, Johann Sebastian Bach-en pare bat doinu joko ditu organoan, Mikel Ansola organo jotzaile gazte markina-xemeindarrak; Emeki Koralak, berriz, lau kanta abestuko ditu Yolanda Loiraren zuzendaritzapean, eta Mikel Ansolaren irakasle eta organo jotzaile ezaguna den Aitor Olearen txanda ailegatuko da ondoren. «Bergarako San Pedro Elizako organo jotzaileak ere parte hartu nahi izan du ekitaldian», zehaztu dute. Ostean, Ondarroako Unanue Udal Musika Eskolak pare bat kanta joko dituzte biolinekin, Eunate Vilchesek gidatuta.
Antolatzaileek aurreratu dutenez, Jabier Ituartek Martin Alberdiren omenez egindako kanta ere entzun ahal izango dute kontzertura doazenek. «Musikari ondarrutarrak Musikari Besarkatuta izeneko kanta sortu du Alberdirentzat, eta pianoagaz eta soinuagaz lagunduta joko dute».
Antonio Nuñezen zuzendaritzapean joko du ondoren, Durangoko Herri maite Soinu Orkestrak. «Mikel Laboaren Haika mutil eta Benito Lertxundiren popourri bat eskainiko dute».
Zazpi hilabete ondoren
Kontzertua zarratzeko, Xemein Abesbatza aterako da oholtzara Mila Milikuaren zuzendaritzapean, eta Aita Gurea, Lau teilatu, Alma, corazon y vida eta Bill Douglasen kanta ospetsu bat abestuko dute.
Azkenik, Euskal Herriko abestuko dute omenaldiko abeslari guztiek batera, orkestraren laguntzagaz, eta Agur Jaunak organoagaz.
Joan den urteko azaroan, Santa Zezilia bezperan hil zen Martin Alberdi musikari markina-xemeindarra, eta Gabonetan hasi ziren jada, Xemein Abesbatzekoak omenaldia prestatzen. «Merezi zuela uste dugu, eta denbora gehiago pasatu baino lehen, egitea pentsatu genuen», azaldu dute. «Jendea etortzea espero dugu».
