Xepe Gallastegik Aurrerako entrenatzaile izaten jarraituko du
Aurrera kirol elkarteak jakitera eman duenez, Xepe Gallastegik beste denboraldi batez nagusien futbol taldea entrenatzen jarraituko du.
Hain zuzen ere, taldea 3. mailara igo eta handik gutxira heldu ziren akordio batera entrenatzailea eta kluba. “Mailaz igo edo ez, berarekin jarraitzea nahi genuen. Egia esan, aspalditik pentsatutako eta aurretik ere berba egindako gai bat zen. Mailaz igo ginenean, baiezkoa eman zigun, eta gu pozik geratu gara. Alde biok ados egon gara, eta arazorik gabe berritu dugu kontratua”, azaldu du Eladino Gonzalez presidenteak.
Hurrengo denboraldia entrenatzaile eibartarrak Ondarroako futbol klubean entrenatzaile legez egingo duen laugarrena izango da. Mikel Aramaiok taldea utzi eta gero, 2012ko abenduan fitxatu zuten Gallastegi, eta orduz geroztik behar ona egin du nagusien taldeagaz.
Eibartarragaz oso pozik daudela nabarmendu du zuzendaritza taldeak. “Behar ona egin du, eta gure aldetik normalena berarekin jarraitzea zen. Postuan jarraitzeko egokiena zela iruditzen zitzaingun, eta bera egotea nahi genuen. Hasiera batetik argi genuen ez genuela aldatzea nahi, ez genuen beste hautabide bat pentsatuta ere”.
Liga amaitu baldin bada ere, zuzendaritza taldeak lanean jarraitzen du. Gipuzkoako ligatik Bizkaiko ligara igaro beharrak lan asko emango die hurrengo egunetan. “Hori dena koordinatu eta horren inguruko plangintza egin beharko da. Fitxak prestatu, entrenatzaileak izango direnak bilatu, fitxaketa berriak egin… behar asko dugu oraindik ere egiteko”.
Era berean, bazkidetza kanpaina martxan dagoela gogora ekarri dute zuzendaritza taldeko kideek. “Kategoriaz igo garela eta, datorren denboraldian aurrekontu handiago beharko dugu, eta horrenbestez indar gehiago beharko dugu”.
Bazkide egin nahi duten guztiek Zaldupeko instalazioetara hurbildu besterik ez dute edukiko. Bazkide egiteko beharrak errazteko gainera, herritarrei argazki bat eramatea komenigarria dela nabarmendu dute.
Bazkideez gain, edozein laguntza ekonomiko ere “ongietorria” izango dela aitortu dute. “Babesle edo laguntzaile modura etorri nahi duena esku zabalik hartuko dugu”.
Klubari dagokionez, sare sozialetan Txoko guztietan Aurrera deritzon kanpaina berria abiatu dute. Nahi duen guztiak Aurrerako elastikoa edo bufanda jantzita edota bandera eskuetan argazkia ateratzeko aukera izango du.
Egun gutxi daramatza martxan ekimenak, eta nahikoa argazki jaso dituzte dagoeneko. Jendea gero eta argazki gehiago ari da bidaltzen munduko txoko guztietatik. Italiako itzulian, esate baterako, Aurrerako bandera gorri urdina ikusi ahal izan da.
Xepe Gallastegi Ohorezko mailako irabazleen kopagaz
Jokalariak igoera ospatzen
Aurrerako kideak udalbatzan egindako harreran
