Gure Esku Dago Ondarroak San Mamesera joateko sarrerak salgai ipini ditu
Ondarroako Gure Esku Dago herri dinamikako kideek ekainaren 21ean San Mamesen egingo den ekitaldi nagusira joateko autobusak antolatu dituzte.
Taldeko kideek jakitera eman dutenez, aukeran bi ordutegi egongo dira. Bata, 10:00etan izango da, eta, bestea, 15:30ean. “Modu horretara, goizeko ekimenetan parte hartu nahi dutenek goizean goizetik Bilbon egoteko aukera izango dute. Bestalde, arratsaldean San Mamesen egingo den ekitaldi nagusian bakarrik parte hartu nahi dutenek, eguerdian irtetzeko aukera edukiko dute”. Autobus guztiak 20:30ak inguruan bueltatuko dira.
Autobuseko txartelez gain, 10 euroren truke San Mameseko ekitaldi nagusira joateko txartelak ere salgai dituztela gogora ekarri dute Ondarroako kideek. Ekitaldian parte hartu nahi duten guztiek Kantoipe kaleko Gure Esku Dago dendan salgai izango dituzte.
Dendak honako ordutegia du: astegunetan 18:00etatik 20:00etara. Horrez gain, asteburuetan Alamedan ipinitako mahaian ere lortu ahal izango dira txartelak, 12:30etik 14:30era.
Kideek nabarmendu dutenez, txartelak ekainaren 17a orduko erosi beharko dira. “Egun horretan saltzen ez duguna bueltatu egin behar dugu eta. Bestelakoan, Bilbon bertan lortu beharko dira”.
Ondarroako Gure Esku Dagoren denda, Alamedan
