2019ra arteko aginte makilak banatu dituzte
B+I taldeak EAJri eman dio alkatetza Mutrikun. Berriatuan, Munitibarren, Ziortza-Bolibarren, Lekeition, Errigoitin, Elantxoben eta Busturian ere aldaketak izan dira alkatetzanMaiatzaren 24ko udal eta foru hauteskundeen ostean, zapatuan osatu zituzten L...
B+I taldeak EAJri eman dio alkatetza Mutrikun. Berriatuan, Munitibarren, Ziortza-Bolibarren, Lekeition, Errigoitin, Elantxoben eta Busturian ere aldaketak izan dira alkatetzan
Maiatzaren 24ko udal eta foru hauteskundeen ostean, zapatuan osatu zituzten Lea-Artibai, Mutriku eta Busturialdeko Udalak. Alkateek aginte makilak hartuta, hauteskunde programetako proposamenak errealitate bihurtzeko lanean hasi beharko dute orain udal ordezkariek.Zenbait herritan alkatetza aldaketak egon dira. Mutrikun, esate baterako, zapatura arte ez zuten jakin nork hartuko zuen datozen lau urteetarako aginte makila, B+I taldeak zuen horretarako giltza, eta Eusko Alderdi Jeltzalearen (EAJ) alkategaia aukeratu zuten. Hala, Jose Angel Lizardi aukeratu dute Mutrikuko alkate; hamahiru bozketatik zazpi eskuratu zituen. Jon Naberan EH Bilduren alkategaiak, aldiz, sei boto jaso zituen.
Iñigo Agirre B+I taldeko ordezkariak azaldu zuenez, «aldaketaren alde» egin dute. Dena dela, alkate izendatzeko botoa ez dela izan datozen lau urteetan gehiengoz agintzeko botoa izan azaldu zuen Agirrek. «Herritarrek hauteskundeetan argi utzi dute alderdi politiko guztien akordioa dela eskatzen dutena». Halaber, herrian botoak gehitu dituen alderdiaren alde egin dutela gaineratu zuen. «B+I taldeko kideontzat ez da erabaki erraza izan; azken bi asteak oso txarrak izan dira guretzat».
Lizardik, berriz, gainerako alderdiekin adostasunak bilatzeko asmoa dutela azaldu zuen: «Herritarrek ere hori da eskatu dutena».
Lekeitio EAJrena
Espero modura, zazpi zinegotziren babesagaz, EAJren alkategai Koldo Goitia aukeratu zuten zapatuan Lekeitioko alkate. Hitza hartuta, zera esan zuen Goitiak: «Niretzako ohore handi bat da hurrengo lau urteetan Lekeitioko alkate izatea. Nire taldeagaz batera, zintzotasunez lekeitiarren arazoei irtenbideak aurkitu, proposamenak egin eta denon artean Lekeitio aurrera ateratzea izango da gure beharra».
Ziortza-Bolibarren, aldiz, EAJ oposizioan izango da lehenengoz. Horrela ba, EH Bilduko Alberto Garrok hartu zuen zapatuan hurrengo lau urteetarako aginte makila. Lau zinegotzi izango ditu koalizioak eta hiru EAJk.
Munitibarren ere aldaketa gertatu da. Horrenbestez, EH Bilduko Arkaitz Goikoetxeak gobernatuko du 2019ra arte. Lau ordezkariko lan taldea izango dute; EAJk, berriz hiru zinegotzi izango ditu.
Berriatuan ere EH Bilduko alkatea izango dute datozen lau urteetan. Ion Arriola izendatu zuten alkate zapatuko udalbatzarrean. Sei ordezkari izango ditu EH Bilduk, eta hiru, aldiz, EAJk.
Aldaketak Busturialdean
Azken urteetan EAJren era EH Bilduren udal taldeen artean tirabirak izan ostean, aginte aldaketa eman da Errigoitin. Hala, hogei urte inguru beranduago EH Bilduk EAJri alkatetza kendu dio. Emakumezko batek hartu du, gainera, herriko aginte makila, Aintzane Arrienek, hain zuzen ere.
Elantxoben, berriz, EAJk kendu dio EH Bilduri alkatetza. Joan den zapatuko osoko bilkuran Jesus Mari Olagibel EAJren hautagaiak hartu zuen alkate kargua.
Busturiak ere alkate berria izango du datozen lau urteetan. EAJko Aitor Aretxagak Miren Fatima Malaxetxebarriaren erreleboa hartuko du. Zapatuan hartu zuen Aretxagak herriko aginte makila, bere alderdikideen lau botoei esker. EH Bilduren hautagai Andoni Elorrietak hiru boto izan zituen. BITeko (Busturia Independiente Taldea) Rodolfo Lartitegik ere bere burua aurkeztu zuen alkatetzarako, eta bi boto izan zituen. Busturiko alkate izatea, batetik, «ohorea» dela esan zuen Aretxagak, bestetik, «erantzukizun handia» ere badela azpimarratu zuen. Erantzukizun hori, baina, bere «konpromiso eta sakrifizio pertsonalagaz» onartzen duela esan zuen. Haren esanetan, «orain arte hauteskunde programa baten proposamenak izan direnak, errealitate bihurtu behar dira orain».
Gorroño eta Bideguren
Busturialdeko herri handienek, Bermeok eta Gernika-Lumok, alkate berak izango dituzte datozen lau urteetan. Bietan, baina, aldaketak egon dira. Bermeon, esaterako, Idurre Bideguren alkateak (EH Bildu) ez du gehiengo absolutuarekin lan egingo orain arte egin modura. EH Bilduren zein EAJren hautagaiek zazpina boto izan zituzten zapatuko osoko bilkuran. Guzan eta Izartu herri plataformek, ostera, ez zuten ez bataren ez bestearen alde egin, bi boto zuri eta baliogabe bat izan ziren horien artean. Hala, herritarren boto gehien izan dituen alderdiaren hautagaiak hartu zuen zapatuan aginte makila.
Gobernu taldea, baina, alderdi guztiekin osatu gura dutela jakinarazi zuen Bermeoko EH Bilduk, «herriarentzat ona izan daitekeela» iritzita. Alderdi desberdinekin zenbait batzar izan badituzte ere, asteon batzartuko dira berriro erabaki bat hartu asmoz. Izan ere, modu batera edo bestera, «ahalik eta arinen» hasi gura dute lanean.
Gernika-Lumon, azkenik, EAJren eskutik, agintean jarraituko du Jose Mari Gorroñok beste lau urtez. EH Bildu koaliziotik atera eta jeltzaleekin akordioa egin zuen Gorroñok, eta Euzko Abertzaleak legez aurkeztu dira udal hauteskundeetara. 11 zinegotzi ditu Euzko Abertzaleak koalizioak, eta sei EH Bilduk.
Beste alde batetik, alderdien arteko akordiorik ez da egon Bizkaiko Batzar Nagusien mahaia osatzeko. Hala, gaur, 10:00etatik aurrera eratuko dira batzarrak Gernikako Juntetxean.
