Antzinako euskal ezkontza eta ohiturak kalera aterako dituzte Lekeition
Lekeitioko Gora Buru kultur elkarteak antolatuta, Euskal jaia egingo dute asteburuan, eta horren barruan, 39. euskal ezkontza antzeztuko dute domekan. “Euskal Herriaren kultura gorde, garatu eta bultzatu, eta batez ere, jendeari gure herriaren berezkotasuna eta apartekotasuna ezagutzera ematea dira euskal ezkontza honen helburuak”, nabarmendu dute antolatzaileek.
1977an egin zuten lehen euskal ezkontza Lekeition, eta orduz geroztik, urtero eutsi diote ohiturari. Hala ere, bere erroak aurretik dituela nabarmendu dute antolatzaileek; 36ko gerra aurretik, orduantxe hasi ziren egiten. Lekeitioko Batzokiak 1931ko irailaren 4an egin zuen estreinakoz, eta halaxe egin zuten urtero gerra iritsi arte. Diktadura urteetan debekatuta egon zen, eta Franco bizi zela, behin bakarrik egitea lortu zuten: Lekeitioko herriak 1964an R. M. Azkueri egin zion omenaldian.
Ospakizun egun handia domekan izango baldin bada ere, zapatuan hasiko dira prestaketa lanak; 19:00etan, ezkonberrien ezkon hornidura guztia eramango duen gurdia prestatuko dute.
Bertan parte hartuko duten hainbat herritarrek Euskal Herrian antzina batean egiten ziren ezkontzen berezitasuna jendeari hurreratzen saiatuko dira. Zehatz esanda, garai bateko Etxe sartzea deritzona antzeztuko dute lekeitiarrek. Guztira, 100 lagunetik gora izango dira garai bateko usadioak gogoratuko dituztenak.
Gurdia, ezkontza segizioa, trikitilariak, joaldunak, dantzariak… denen artean sekulako irudia osatuko dute, XIX. mende eta aurreragoko janzkeragaz eta tresneriagaz.
Beste urte batez, horiek denek Anbrus Mailabiabarrena Garro-Gerrikagogeaskoa eta Josepa Meabe-Ansorena Zengoitia ezkongaien lagun izango dira. Ispasterko eta Lekeitioko bi gazteen antzezpena, aurten, Alvaro Galletebeitiak eta Irene Lauzirika lekeitiarrek egingo dute. Berezitasun legez, biak ere bizitza errealean bikote dira.
Euskal jaia, egitaraua
Euskal ezkontza, Lekeition. Argazkia: Kiñuka
Lekeitioko euskal ezkontza. Argazkia: Gora Buru kultur elkartea
