Ondarroan saldu diren lehen hegaluze kiloak merke saldu dira
Gaur [ekainak 22] saldu dituzte Ondarroan denboraldiko lehen hegaluze kiloak. Kalare Deuna kofradian ikusmina handia izan baldin bada ere, espero baino merkeago saldu da arraina eguneko lehen bentan. Hain zuzen ere, tamaina handiko hegaluze kiloa 5,09 euroan ordaindu dute enkantean.
Zapatu arratsaldean porturatu zen Itoitz ontzi ondarrutarrak ekarri ditu lehen aleak, eta goizaldeko ordu txikietan arraina deskargatu ostean, aurreikusitako legez, 07:00etako bentan saldu dituzte.
06:30an jo du turrun bakarrak, eta ordurako kofradia eta inguruak erosleez eta jakingura zuten herritarrez bete dira. Denak ere, hainbat ezkabiatan ipinita zegoen arrainaren kalitateari begira aritu dira denbora luzez.
Iragarritako orduan hasi da benta, eta ordurako bentalekuko ia aulki guztiak beteta egon dira. Lehendabizi, tamaina handiko arraina saltzen hasi dira. Guztira, 33 ezkabia erosteko aukera izan dute erosleek.
Tamaina handiko hegaluzeari dagokionez, garestiena 5,09 euroan saldu da eta merkeena, 3,60 euroan. Erdi tamainako hegaluzea, ostera, zer edo zer merkeago saldu da. 46 ezkabia egon dira aukeran, eta lehen erosleak 15 erosi ditu; kiloa 3,69 euroan ordaindu du. Merkeena, ostera, 2,46 euroan saldu da.
Azkenik, tamaina txikiko bi ezkabia saldu dira. Kiloa 2,32 euroan ordaindu da. Hegaluzeez gain, moja ezkabia bakarra ere saldu da; kiloa 3,19 eurotan. Azkar amaitu da benta: 07:15ean.
Eusebio Arantzamendi Kalare Deunako kofradiako presidentearen iritziz, merke saldu da denboraldiko lehen arraina.
[nggallery ID=256]
Erosleak arrainaren kalitatea ikuskatzen
Erosleak hegaluzea ateratzen
Erosleak arrainaren kalitatea ikuskatzen
