Belaunaldi ezberdinen elkargunea izan da Markina-Xemeingo Bekobenta eskola
Urte asko pasatu arren, berehala sentitu zuten, berriro ere, eskolako izpiritua Bekobentakoek. Zapatuan eduki zuten 40. urtemuga jaia, eta eskolan bizitako oroitzapenak gogora ekarri zituzten guztien artean. Hainbat belaunaldietako ia 100 lagun elkartu ziren eskolan, estreinako aldiz egin duten topaketan.
Denekin batera ospatzeko gogotsu, baina zein agertuko jakinminez batu zen lehenengo taldea eguerdian, Arkuetan. Aurpegiak B letragaz margotu eta puxikak puztuta ibili ziren kalejira alaian tabernaz taberna.
14:30ean heldu ziren Bekobentara, eta argazkiak ateratzea izan zuten lehen lana. Guztiak batera, taldeka, irakasleak irakasleekin… denetarik.
Eskolako jantokian bazkaldu ondoren, kantak abestu eta bideoan bildutako eskolako historiaren erakusgai diren argazkiak ikusi zituzten.
Baina arrakasta handiena Naroa Loiolak idatzitako bertso idatziak eduki zuten. Gitarraren eta flautaren musikagaz lagunduta kantatu zituzten bertsoak denek batera, hunkituta.
Jolasean ere aritu ziren: soka saltoan, soka tiran, txokor batzen eta silla jokoan, eta eskolako eraikinak izandako aldaketak ere ezagutzeko irrikaz agertu ziren batzuk. Beraz, zuzendariaren laguntzagaz gelaz gela berrikusi zuten Bekobenta punta batetik bestera.
Egun ederra pasatu zuten Bekobentakoek, errepikatzeko modukoa, beraz, seguruenik, beste 40 urte baino aurretik ailegatuko da berriz biltzea.
Bekobenta eskolako ikas-komunitatea. Argazkia: Alazne Urrutia
Bekobenta eskolako 40. urteurren jaian parte hartu zutenak eskola aurrean. Argazkia: Alazne Urrutia
