Lekeitioko batzordeen osaketa eztabaidatuko dute udaldian EAJk eta EH Bilduk
Udal Batzordeen osaketarako eztabaidak hasiko dituzte udaldian Lekeitioko talde politiko biek. 2015eko udal hauteskundeetako emaitzen ondoren, joan den asteko osoko bilkuran eratu zuen Lekeitioko Udalak Tokiko Gobernu Batzorde berria, eta EAJk osatutako udal gobernu berriak oposizioko talde bakarra, EH Bildu, udal gobernuan parte hartzera gonbidatu zuen, «denon artean eta denon alde Lekeitio eraikitzeko». EH Bilduk eskaintza eskertu eta udaldiko eztabaidetan adostasun batera iritziz gero, Tokiko Gobernu Batzordean parte hartuko zuela esan zuen.
Tokiko Gobernu Batzordean parte hartzea eskaintzeagaz gain, Udal Gobernu berriak Kultura eta Gazteria Batzordeen burutza izatea ere proposatu zion EH Bilduri, alderdi bien artean alor horietako programak adostuz. Horrela, udaldia erabiliko dute adostasun batetara ailegatzeko.
Guztira, hamalau batzorde osatuko dituzte Lekeition: Hirigintza Batzordea; Herri lanak, Udal zerbitzu, Azpiegituren mantenimendu eta Ingurugiro Batzordea; Ogasuna, Ondarea eta Kontuak Batzordea; Udal Barne Antolamendu eta Langileak Batzordea; Garapen Ekonomikoa eta Lehiakortasuna; Emakumea/Berdintasuna Batzordea; Kirola Batzordea; Gazteria Batzordea; Herritarrekin harremanak eta Parte hartze Batzordea; Euskara Batzordea; Hezkuntza, Haurtzaroa eta Gaztetxoen aisialdirako Batzordea; Jai Batzordea; Kultura Batzordea eta GizarteOngizateBatzordea. Azken horrek, bi azpibatzorde izango ditu: Migratzaileak Azpibatzordea eta Hirugarren Adina Azpibatzordea.
Batzordeak, irailetik aurrera hasiko dira martxan, eta herritarrak euretan parte hartzera animatu ditu Lekeitioko Udalak.
Bestalde, Lekeitioko Udalaren ohiko osoko bilkurak bi hilerik behin egingo dira, hileko lehen eguenetan, 19:00etan, udaletxean.
Alkate eta alkate ordearen dedikazioa
Alkate eta alkate ordearen liberazioak eta dedikazioak ere onartu ziren joan den asteko osoko bilkuran. Izan ere, alkatea eta alkate ordea egongo dira aurrerantzean udaletxean lanean.
Bizkaiko Foru Aldundiko 81/2015 Foru Dekretuak Bizkaiko korporazioetako kideek jaso dezaketen ordainsariak zehazten ditu, herrietako biztanle kopurua kontuan izanda. Eta nahiz eta Lekeitioko Udaleko liberatuentzako altuagoak izan, Lekeitioko alkateak eta alkate-ordeak, orain arte beraien lanean izan duten soldata bera jasoko dute. Erabaki bera hartu zuten aurreko agintaldian ere, alkate-ordearen soldata jartzerakoan. Hau da, bere lanean kobratzen zuen kopuru bera ezartzea Lekeitioko Udalean egindako lanagatik.
81/2015 Foru Dekretuaren arabera, Lekeition, urtean, 60.378,32 euroko gehieneko muga dute ordainsarian liberatuek. Lekeitioko alkate eta alkate-ordeak, berriz, orain arte Eusko Jaurlaritzan eta Bizkaiko Foru Aldundian goi mailako teknikari izan dituzten soldatak mantenduko dituzte, hau da, bakoitzaren lanpostuan izan duten soldata bera (soldata gordina) jasoko dute. Horrela, alkateak, 44.387,22 euro irabaziko ditu urtean eta alkate ordeak, 48.221,48 euro.
Lekeitioko Udalbatza berria, EAJko zazpi ordezkarik, (Koldo Goitia alkateak, Amaia Antxustegi, Idoia Sagastizabal, Oier Zuberogoitia, Mertxe Arrizubieta, Josu Itza eta Abel Iriondo), eta EH Bildu alderdiko seik (Jon Andoni Seijo, Edriga Aranburu, Miren Terese Aboitiz, Xabier Arrate, Myriam Etxebarrieta eta Ainhoa Lopez) osatu dute.
Lekeitioko zinegotzi guztiak pleno aretoan udal osaketa egunean.
