Ondarroako Errebelde Eguna mozorrotuta eta giro onean dator
Gazte Asanbladak antolatuta, zapatuan [uztailak 11] Errebelde Eguna ospatuko dute Ondarroan. Eguerditik hasita, goizaldeko ordu txikiak arte antolatu duten ekimenetan parte hartzeko deia egin diete herriko gazte guztiei.Hain zuzen ere, «ahalik eta mozorrorik zoroena jantzita», egunagaz gozatzera irtetzeko deia egingo dute Gaztetxeko kideek.
Eguneko lehen ekimena bazkaria izango da. 14:30ean, Gaztetxe aurrean batuko dira eta han aurrean ipinitako mahaietan jango dute. Izena emateko zerrendak Anaitasunan, Kirrixkin, Basatin eta Gaztetxean bertan ipini dituzte. Iaz, esate baterako, 40 lagun batu ziren paelladan.
Bazkalosteko orduak, aldiz, jolasean igarotzeko asmoa dute. Horretarako, Altxorraren bila berezia prestatu dute.
18:00etatik aurrera, herri guztian zehar aurkitu beharko dituzte pistak.
Eta gauean, punk-rock estiloko doinuek eztanda egingo dute Gaztetxeko oholtza gainean. 22:30etik aurrera, Ermuako Issuna, Altsasuko Desvarios Varios eta Skaleak talde gipuzkoarraren kantuez gozatzeko aukera egongo da. 20:00etatik aurrera, gainera, gaztetxe kanpoan ipinitako txosnan ogitartekoak jateko aukera egongo dela nabarmendu dute Gazte Asanbladako kideek.
Iazko Errebelde Eguneko bazkaria. Argazkia: OGA
