Lekeitioko jaiak "modu osasuntsuan bizitzetik urrun" daudela esan du Potxuak Martxan taldeak
Egunerokotasunean ematen diren genero rol eta indarkeriak jaietan eztanda egiten dutela jakinda, autodefentsa feminista aldarrikatuz, eraso sexisten kontra agertuz eta jaiak denentzako gozagarriak izan behar zirela helburu edukita hasi zituzten jaiak Potxuak Martxanekoek. 300 lagun batu zituen elkarretaratzea antolatu zuten, bestelako jai eredu bat eta bestelako harreman eredu bat aldarrikatuz. Horretaz gainera, protokoloa ere martxan jarri dute jaietan eta autodefentsa feminista aldarrikatu dute 700 txiribito banatuta. “Antzar egunean ere, inoiz baino ageriago egon zen gure aldarria, banderola lilak non-nahi egon ziren. Antzar eguneko esatariak zoriontzen ditugu berdintasunaren aldeko mezuak zabaltzen laguntzeagatik, bai eta manifestazioan zein jaietan sare feminista osatu duten norbanako guztiak ere”, nabarmendu dute.
San Antolin jaien hasieran egin zen eraso sexisten kontrako elkarretaratzea. Argazkia: Potxuak Martxan
Bestalde, jaietako pregoian, eraso sexisten kontrako mezuren bat egotea bota dute faltan. “Momentu guztiak eta leku guztiak aprobetxatu behar direlako eraso sexisten kontra egiteko”.
Sare feminista osatzen jarraituz
Helburu bakarra dutela esan dute Potxuak Martxaneko kideek: “Denok gustura eta trankil egongo garen jaiak egitea Lekeition”. Eta, Euskal Herriko beste hainbat herri eta hirietako jaietan salaketak egon direla gogora ekarri dute. Hori dela eta, eraso sexistarik gabeko herri baten alde lanean jarraituko dutela azpimarratu dute, “horretarako tresnak sortzen eta laguntzak topatzen”. Beraz, Potxuak Martxanegaz batera borroka feministan lanean jarraitu nahi duenari potxuakmartxan@gmail.com helbidera idatzi eta Lekeitio morez margotzeko gonbidapena egin diote.
