Aitzol Etxabururen senideak bisita gabe utzi dituzte
Etxerat elkarteak jakitera eman duenez, Aitzol Etxaburu preso politiko ondarrutarraren izeba eta osaba bisita gabe utzi dituzte Clairvaux (Frantzia) kartzelako funtzionarioek. Bisita gabe uzteko aitzakia modura funtzionarioek senideen hutsegite bat baliatu dutela salatu du Etxeratek.
Aurreko zapatuan [irailak 26] egindako bisitan jaso zuten ezezkoa senideek. Antza denez, bisitara sartu aurretik poltsikoetan dirua zuela konturatu zen famili kideetako bat, eta detektatzailetik igaro aurretik kutxatilategiko giltza eskatu zuen dirua gorde ahal izateko. Etxeraten arabera, hortxe hasi ziren txarto ulertuak. “Giltza eman beharrean dirua Aitzoli pasa nahi ziotela leporatu eta beste gela batera pasa zituzten, bi orduz. Senideek behin eta berriro bueltako bidaiarako dirua zela errepikatzen zuten bitartean, funtzionarioek zentzugabeko tesi hori mantendu zuten”.
Bi orduz kartzelako gela batean izan ostean, jendarmeek komisaldegira eraman zituzten senideak. Haien arabera, dirua kendu zieten, eta horrez gain, deklarazioa eta hatzetako aztarnak hartu zizkieten. “Hasiera batean, jendarmeek ez zieten dirua itzuli nahi izan, baina bueltarako bidaiarako ezinbestekoa zutela errepikatu zutenean iritziz aldatu zute”.
Azkenik, hiru hilabetetan bisitarik gabe zigortuko dituztela jakin ostean, 14:00ak aldera (hiru bat ordu beranduago) aske utzi zituzten. Zigorra zenbaterainokoa izango den fiskalak erabakiko duela nabarmendu dute. “Etxeratetik, azalpenak eskatzen dizkiogu kartzela horretako zuzendariari, eta aurrekoetan bezala, horrelako bidegabekeriak geldiarazteko horren emaitza ona eman duten kexa eta salaketak Clairvauxeko kartzelara zuzendu ditzatela animatzen ditugu herritarrak. Ezin ditugu gure eskubideak uneoro kartzelako funtzionarioen arbitrariotasun, gehiegikeri eta inolako profesionaltasunik ez duten jarreren menpe utzi”.
Aitzol Etxabururen lagun eta senideak
Aitzol Etxabururen lagun eta senideak
