Eguzkipean ospatu dute mutrikuarrek San Jeronimo Eguna

2015/09/30

Herri esaerak dioenaren aurka, gaur [irailak 30], Mutrikuko Mijoa auzoan eguzkipean ospatu dute San Jeronimo Eguna. Hain zuzen ere, San Jeronimo txizati Eguna deitzen diote askok, euria askotan egiten duelako.Hala ere, goizaldean sekulako ekaitza egon da, eta auzotarrak ohitura beteko zenaren beldur baziren ere, azkenik, eguna eguzkitsu argitu du.

Auzotarrak txosnan eztarriak bustitzen

Urteroko hitzorduari hutsik egin gabe, jende asko batu da San Jeronimo ermitaren bueltan, baina gaurkoan beste urte batzuetan baino gehiago batu dela adierazi dute auzotarrek. “Aste barruan gaudela kontutan hartuta, pozik gaude gerturatu den jende kopuruarekin. Egia esan, aurreko egunetan ere eguraldi ederra egin digu, eta hortaz, gozatzeko aukerarik ez da falta izan”. Mezatan hasi dute jaieguna, eta urtero modura, asko eta asko izan dira elizkizuna galdu nahi izan ez dutenak. San Jeronimo ermita bete-beteta egon da, eta kanpoan ere meza entzun duenik ere egon da. Ondoren, Mutriku Sokatira Taldekoek herri kirol erakustaldia egin dute han batutako guztien gozamenerako.

Auzotarrak erroskillak saltzen

Mutrikutik eta inguruetatik etorritako herritarrak eztarriak bustitzen eta gosea asetzen zuten bitartean, ekinean aritu dira sokatira taldekoak. Besteak beste, lokotx batzen, lasto altxatzen, lasto jaurtitzen, trontzan, ingudea altxatzen eta gurdia eramaten aritu dira kirolariak. Han batutakoek txalo zaparrada artean eskertu dute herri kirolariek egindako ahalegina. Norgehiagoka politak ikusteko aukera ere egon da. Horietan bereziena, beharbada, Patxi Ituarte Isasik eta Oier haren bost urteko semeak egindakoa izan da. Biak fin aritu baldin badira ere, semeak aurrea hartu dio aitari azken metroetan.

Txinga eramaten

Eguerdian atsedenaldia egin ondoren, arratsaldean jarraituko du jaiak Mijoan. Arratsaldea, bereziki, etxeko txikienei zuzendua egongo dela aurreratu dute antolatzaileek. Traperos del rio pailazoek Zeren zain ikuskizuna eskainiko dute, eta gero, Ibiri baserriko zezen txikiekin eta pottokekin jolasteko aukera egongo da, iluntzera arte. Aspaldiko urteotan egin bezala, gainera, Patxilin de Isasi toreatzailea ere han ibiliko da han batuko direnen irribarreak sortzen.