Nordic Walking guneen sarean sartu da Markina-Xemein
Markina-Xemeingo Udalak Eusko Jaurlaritzako Osasun Sailaren laguntzagaz Markina-Xemein Nordic Walking Gunea sortu du. Egitasmoaren helburuak kirola sustatzea, osasuna sendotzea, jarduera fisikoaren bidez bizitza osasuntsuaren ohiturak sendotzea eta turismoa bultzatzea direla azaldu dute.
Zapatuan, urriak 3, inauguratuko dute Markina-Xemeingo Nordic Walking gunea. Izan ere, Nordic Walking teknikarako zailtasun mota ezberdineko lau ibilbide prestatu dituzte Markina-Xemeinen: Kanteramotxa, Arkillogana, Ubilla-Urberuaga eta Orbero. Ibilbideen mapak Markina-Xemeingo udaletxean eta Atxondo kiroldegian egongo dira eskura.
Nordic Walking teknika ezagutzeko, 10:00etan teknikaren hastapen kurtsoa emango dute. Ikastaroa doan izango da eta nahi duen guztiarentzat zabalik dago. Ikastaroan parte hartu nahi duenak baina, izena eman behar du aldez aurretik 945 010 948 telefono zenbakian edo nwgunea@nordicwalkinggunea.net helbide elektronikoan.
Antolatzaileek hamar bat makila eramango dituztela jakitera eman du udalak, hala ere, mendiko makilek ere balio dutela azaldu dute.
12:30ean egingo da Markina-Xemein Nordic Walking gunearen aurkezpena kultur aretoan. Proiektua bera eta teknikaren bidez lortzen diren onurak ezagutzera emango dituzte.
Handitzen doan sarea
Nordic Walking Guneen Sarea 2012 urtean martxan jarri zen nazioarteko ereduetan oinarrituta dago eta jadanik Sare horretan 18 herri eta 3 Parke Teknologiko daude. Nordic Walking Gunea sarrera librea duen espazioa da, pertsona guztientzat pentsatuta dagoena (adinak ez du garrantzirik) eta bere jomuga osasuna hobetzen laguntzen duen ipar martxaren jardutea da; bi makilen laguntzaz praktikatzen da. Horrez gain, teknika honen bidez gunea kokatuta dagoen herriko natura eta kultur arloko paisaia-aberastasuna ezagutzea ahalbidetzen du.
“Markina-Xemeingo Nordic Walking Guneak seinaleztatzeko azpiegitura egokiei esker, gure inguru naturalaren eta kulturalaren balioa nabarmentzen du. Zelaiak, laborantzarako soroak, baserriak, basoak, Patrokua jauregia, Santa Maria eliza eta beste hainbat altxorrez gozatzeko aukera egongo da proposatzen diren ibilbideren bat egiterakoan”, azpimarratu du udalak.
Jendea Nordic Walking teknika praktikatzen. Argazkia: nordicwalkinggunea
Nordic Walking teknika praktikatzeko erabiltzen diren makilak. Argazkia: nordicwalkinggunea
