Ekintzaileei zuzendutako bigarren tailerra egingo da Mutrikun
Mutrikuko Udalarekin elkarlean, eta ZuEkin egitasmoaren baitan, Debegesa garapen agentziak bigarren prestakuntza tailerra eskainiko du Mutrikun, “ekintzaileei euren negozioa abian jartzen laguntzeko”. Tailerrak, hain zuzen ere, Debegesak urrian eskainitako formazioari jarraipena emango dio. “Tailer hura negozio ideia berriak sortzera bideratu zen. Zazpi lagunek parte hartu dute, eta denetara, sei negozio ideia sortu dira”.
Bigarren saioari dagokionez, negozio ideia garatzeko eta enpresa martxan jartzeko prestakuntza emango da. “Besteak beste, bideragarritasun plana landu, merkatua aztertu eta marketin plan bat egiteko oinarriak finkatuko dituzte parte hartzaileek”.
Tailerra datorren astelehenean [azaroak 9] hasiko da, eta sei egunetako luzera izango du (azaroaren 18a arte). Eskolei dagokienez, Konde kaleko bulegoan egingo dira 09:30etik 13:30era. Parte hartu nahi dutenek aurretik eman beharko dute izena 943- 82 01 10 telefono zenbakira deituta edota ekintzaile@debegesa.eus helbidera idatzita. Izen ematea doakoa dela gogorarazi dute Debegesako arduradunek.
