38. Euskal Zine Bilera aurkeztu dute Bilbon
Euskal zinearen hitzordua heltzear dago. Gaur goizean aurkeztu dute 38. Euskal Zine Bilera Euskal Zine Bilerako kide Joseba Zuberogoitiak, Lekeitioko alkate Koldo Goitiak eta Mertxe Arrizubieta kultur Zinegotziak. Lekeitioko ordezkariekin batera egon dira Bilboko BBK aretoan, Gotzon Sanchez aurtengo bilerako epaimahaikidea, Lorea Bilbao, Bizkaiko Foru Aldundiko Kultura Diputatua, Leire Aragon BBK Gizarte Ekintzako Zuzendaria eta Aritza Escandon Topaguneko ordezkaria.
38. Euskal Zine Bileraren aurkezpen ekitaldia. Argazkia: Lekeitioko Udala
Euskal zinearen hitzordua azaroaren 22tik 29ra izango dela zehaztu dute. Horrela, zortzi egunez, euskaraz filmatu denaren errepasoa egiteko aukera ederra egongo da Lekeition.
Aurten, 41 filmek hartuko dute parte lehiaketan: hamar film profesionalek eta 31 lan amateurrek.
Zortzi egunetako egitarauan protagonista nagusiak zinemagileak direla azpimarratu dute. “15.000 euro ditugu saritan, eta kategoria bakoitzean, Zuzendaritza, Ekoizpena, Gidoia eta Argazkia arloak sarituko dira”, azaldu dute.
Profesionalen sailean, arlo bakoitzeko 1.600euro eta zilarrezko antzarra dira sariak, amateurrean berriz 1.000 euro eta zilarrezko antzarra. Horrez gain, jaialdiko saririk preziatuena, Film Onenaren saria ere profesional eta amateurren kategorietan emango dute. Lan profesionalak 1.900 euro eta urrezko antzarra jasoko ditu eta amateurrak 1.300 euro eta urrezko antzarra.
38. Euskal Zine Bileraren aurkezpena. Argazkia: Lekeitioko Udala
Epaimahai lanetan Aitor Merino, Gotzon Sanchez, Oihana Garro, Iban Gonzalez eta Izaskun Alvarez arituko dira, eta ohi duten modura, azaroaren 28an egingo den amaiera ekitaldian banatuko dituzte sariak. Egun horretan emango dute jakitera bai eta ere Benito Ansola Bekaren lan irabazlea.
Berbaldia
Euskal Zine Bilera baina, ez dute lehiaketara mugatu nahi. “Lehiaketa baino topagunea da gurea”, esan dute. Horregaitik, azaroaren 28an, Lekeitioko Berbaldia antolatu dute bigarrenez. “Oraingoan, euskarazko film laburrei zuzenean kolpatuko diegu, Euskal Film laburren kartografia deituriko mahainguruarekin”, aurreratu dute. Mahaingurua Txema Muñoz Kimuak film laburren programako zuzendariak, Jon Garaño zuzendari, gidoilari eta ekoizleak, Maider Fernandez zinemagile eta Las Chicas de Pasaik-ko partaideak, Kepa Sojo zuzendaria, gidoilari eta historialariak eta Miren Manias euskarazko zinemagintzan ikerkariak osatuko dute.
Begirada
Euskal Zinearen Begirada atalagaz jarraituko dute aurten ere. Horrela, begirada, oraingoan, Aitor Mazori zuzenduko diote. “Joan den maiatzean Aitor Mazoren heriotza dela eta, Euskal Zine Bilerak argi ikusi du beroni tarte bat eskaini behar zaiola”. Beraz, azaroaren 26an Mazoren zinemagintzako jardunbideari errepasoa egin eta omenduko dute.
Lehenengoz domekara arte luzatuko da euskal zine bilera. Egun horretarako, goizeko zine emanaldi berezi bat prestatu dute: 38. Euskal Zine Bileran saritutako filmek osatutakoa.
