Ondarroako esaerak jasotzen dituen Ahuakemonala aplikazioa abian da
Gaurtik [azaroak 19] aurrera Ondarroako hainbat esaera eta berba jasotzen dituen Ahuakemonala aplikazioa erabilgarri dago. Android mugikorretan eta tabletetan erabili daiteke aplikazioa, eta Ondarroako Udaleko Euskara Batzordeak, herriko beste eragilerekin batera, martxan ipinitako Ahuakemonala egitasmoaren barruan aurkeztu dute. “Herriko Euskara Plana prestatzean argi ikusi genuen esaera bildumak eginak genituela, baina erabiltzaileen eskura ipini behar zirela, eta, hain zuzen, egitasmoa eta aplikazioa bera horrexetara datoz: gure berbak eta esaerak plazara atera, gazteengana iritsi eta teknologia berriak erabili”, aipatu du Eneritz Basurko euskara zinegotziak.
Aplikazio berria Iametza interaktiboak garatu du, eta bertan Ondarroan erabiltzen diren Aire globun, demasa, dra eta tankerako 600 esaera eta hitz berezi baino gehiago batu dituzte. Aplikazioaren eragileek nabarmendu dutenez, herriko hainbat talderen laguntza izan dute: “Radixu irratia eta ondarruberbetan eta ondarrutarnaturala izeneko webguneak, eta, batez ere, herritarren ekarpena izan da gakoa. Udan, 70 herritar baino gehiago pasatu dira Radixu Irratitik grabaketak egitera”.
Aplikazioa herritarrekin batera garatu dute. Zehatz esanda, aplikazioan entzun ahal diren esamolde horiek herritarren ahotsekin grabatu dituzte. Herriko haurrak, gazteak nahiz helduak prest egon dira beraien ahotsak jartzeko, eta bakoitzak bere doinua ipiniaz, aplikazioa “izugarri aberastu” dutela azpimarratu dute eragileek.
Partekatzeko aukera
Aplikazioa deskargatu ostean, bertan agertzen diren grabazio guztiak Facebook, Twitter, posta elektronikoa edota Whataspp bidez lagunekin eta ingurukoekin partekatzeko aukera eskaintzen du aplikazioak.“Ahuakemonala denontzako egitasmo bat da, entretenimendu bila dabilenak erraz aurkituko du aplikazioan; baina ez da entretenimendu hutsa, hori baino askoz gehiago da; izan ere, gure berbetari balio handiagoa emango diogu erabiltzen dugun bakoitzean” gaineratu du Basurkok.
Ondarroako Udalak aplikazioa deskargatu eta jolasteko gonbitea egin nahi die herritarrei “aukera ederra delako ondo pasatzeko” eta, bide batez, zerbait ikasteko. “Proba moduan erabili dutenek oso gustura egon dira eta irrikatan daude lagunei esateko”.
Ahuakemonala, mugikorretarako aplikazioa
Herritarrak aplikazioa erabiltzen
