Arrain asko porturatu dute egunotan Ondarroan
Baxurako arrantzaleek egunotan arrantzaldi onak egin dituzte. Aurreko astean, itsaso zakarra zela eta, portuan lotuta luze egon ziren, baina egunotan, arraina badabilela nabarmendu dute arrantzaleek. Horren adibide, bi egunetan 525 tona arrain baino gehiago saldu dira Ondarroako Kalare Deuna kofradiako bentan.
Kofradiako arduradunek igorritako datuen arabera, kopuru guzti horren gehiengoa sardina izan da. Martitzenean [abenduak 1] eta eguaztenean [abenduak 2], esate baterako, 404 tona sardina saldu dira bentan. Kopuru aldetik asko egon baldin bada ere, prezio aldetik ez du gorabehera handirik eduki; euroaren bueltan saldu dira sardina aleak egunotan.
Martitzenean [abenduak 1], esaterako, 307 tona lehorreratu zituzten. Bataz beste, 80 zentimoan saldu zen sardina kiloa. Sardinaz gain, txitxarro baltza eta zuria, betandia, sarboa, txopa eta boba ere saldu ziren.
Eguaztenean [abenduak 2], ostera, saldu zen arrain kopurua handia izan bazen ere, ez zen martitzenekoa besteko handia izan. Hala ere, goizetik arratsaldera bitartetan porturatu ziren ontzien joan-etorria handia izan zen. 08:30ak 09:00ak bueltan, esaterako, moila guztia ontziz beteta zegoen, eta batzuek deskargatzen zuten bitartean, beste batzuek zain egon behar izan zuten.
Datuei dagokionez, guztira, 153.600 kilo arrain saldu ziren eguaztenean. Gehiena, sardina izan zen: 97 tona. Kopuru aldetik aurreko egunean baino gutxiago lehorreratu zenez, bentan zer edo zer garestiago saldu zen kiloa; bataz beste, 96 zentimoan. Bestalde, txitxarro baltza eta zuria, betandia, boba, sarboa eta txopa ale batzuk ere saldu ziren.
Era berean, gaur [abenduak 3] ere arrain asko porturatu dute Egidazu Kaian. Goizean goizetik hasita, ontzien joan-etorri etengabea izan da. Lehen orduetan, batez ere sardina saldu baldin bada ere, eguerdi osterako porturatu dira ontzirik gehienak. Izan ere, urruti ari dira sardina arrantzatzen, Ondarroatik 100 bat miliara.
Kofradia aurrea, gaur goizean, arrainez beteta
Arrantzaleak, gaur goizean, arraina deskargatzen
