Lekeitioko EAJ eta EH Bildu ez dira gobernu akordio baterara ailegatu
Lekeitioko bi alderdi nagusien arteko udal gobernu bat osatzeko eztabaidek ez dute esperotako emaitza onik eduki. Lekeitioko EH Bilduk udal ordezkaritza daukaten bi alderdi politikoen oinarrizko programak bateratu eta elkarlanerako baldintzak batzen zituen testua proposatu zion EAJri, baina, EAJren erantzunak kontrako norabidetik abiatu direla adierazi du koalizioak.
«Lekeitioko EHBilduk erantzukizun politikoz jardun nahi du, zalantza barik. Herriko aukera politiko nagusi bien arteko elkarlana beharrezkoa deritzo, eta, horrexegaitik alde biontzat justua litzatekeen proposamena egin zion», adierazi dute. EAJk, ostera, euren programa osoa ziurtatu nahi dutela azpimarratu dute, EH Bildurena baztertuz eta oinarrizko konpromisoei ere izkin eginez. «Hau da, karnata apurtxu bat emon, kate motzean lotuta eukitzeko. Hori ez da erantzukizun politikoa maltzurkeria politikoa baino», esan dute.
Ezezkoak
Aurreko agintaldian EH Bilduk gobernu batzordeko parte izateko eskaintza egin zion EAJri, eta jeltzaleek ezezkoa eman zioten. Udal osaketa berriaren ostean, EH Bilduk gobernu batzordearen osaketarako antzerako proposamena egin dio eta oraingoan ere ezetzkoa jaso dutela azpimarratu dute EH Bildukoak. «Baina zuzen adierazi beharrean, zeharka-meharka. Berriro erakutsi dute euren aginte osoa ziurtatu nahi dutela, egunerokotasunean kudeaketa atzerakoia eta iluna eginez».
EH Bilduk hala ere, oposizio eraikitzailea egiten jarraituko duela adierazi du, «herriari eta herritarrei zor dielako», eta aurrerantzean ere, eskuak luzatuta dituztela jakitera eman dute, «zintzotasunez egindako elkarlanean oinarritutako gobernu akordiorako». Baina,gobernu akordio serio eta sendoa beharrezkotzat jotzen dute horretarako.
