Turisten profila aztertu dute Lekeition, Itsas-Arrantza Ondarearen Jardunaldietan
Turismoa sustatzeko bideak jorratu dituzte gaur goizean, Lekeitioko kultur etxean burutu diren Itsas-Arrantza Ondarearen Jardunaldien zortzigarren ekitaldian. The Basque Way bidai agentziako Noemi Lekubek turistek zer bilatzen duten azaldu du, bere esperientzia personaletik abiatuta.
Turistek gertutasuna bilatzen dutela nabarmendu du Mutrikuko gidariak. Historia baino gehiago nahi dutela azaldu du: lotura bat lortu, konektatu. Beraz, komunikatzeko beste modu bat erabiltzen duela aitatu du, turista eta gidaria bera zein herrialdea lotuko dituen istorioak tartekatuz.
Turistak, batez ere, Donosti eta Bilbotik hasita zabaltzen direla Euskal Herriko beste herrietara zehaztu du Lekubek. Hiriburuak ezagutu eta beste herrietatik bira bat egiten dutela. “Bilbora konexio ona dago eta Donostia ondo saltzen da gastronomiagatik. Gero, ezgututakoan, beste guztiak txunditzen ditu: paisaiak, jendeak, ohiturek”.
Kultura bilatzen duen turistak era entretenigarri batean jaso nahi duela historia azpimarratu du Noemi Lekubek, xehetasunetan gehiegi sakondu barik, eta amaieran zer edo zer jan eta edateko aukera badago, hobe. Gida “motza, arina eta zoragarria” nahi dutela azpimarratu du, “eta eskatzen dutena eman behar zaie”.
Basilika
Aurreko urteetan Sosoaga Jauregiko dolarea, Santa Katalina Itsasargia eta Marierrotara bisitak antolatu dituzte. Aurten, berriz, udan martxan jarritako proiektu pilotuari jarraituz, Jasokundeko Andra Maria Basilika landu dute. Horrela, Juan Manuel Gonzalez Cembellin Bilboko Eliz Museoaren zuzendariak bisita gidatuen proiektua azaldu du eta bisita gidatu bat egin da basilikara bere eskutik.
2008ko uztailean eta abuztuan Jasokundeko Andra Maria Basilika ezagutzera emateko egin zen bisita gidatuen kanpaina gogora ekarri du Gonzalezek. Kanpainak harek emaitza onak lortu zituela azaldu du, eguneko 250 pertsona joan bait ziren bisitan. Baina, arrazoi ezberdinak medio ezin izan zuten bisitekin jarraitu.
Noemi Lekube bere esperientzia kontatzen Itsas-Arrantza Ondarearen Jardunaldian.
Juan Manuel Gonzalez Cembellin Jasokundeko Andra Maria Basilikara egin den bisita gidatuan.
Joan den urteko abenduan, bestalde, sakristaua erretiratu egin zen, eta beraz, ordutik, basilika elizkizun orduetan besterik ez dute zabaldu. Hori dela eta, arazo horreri konponbidea eman nahian, udalak eta elizak elkarlanerako hitzarmena sinatu zuten eta bisita gidatuen proiektu bat jarri zuten abian, basilika berriz ere udaldian bisitatu ahal izateko. Bisita libreak eta gidatuak eta audiogida zerbitzua antolatu zituzten 31 egun ingurutan.
Bilboko Eliz Museoaren zuzendariak zehaztu duenez, emaitzak onak izan dira, nahiz eta eguneko 2008an baino bisitari gutxiago eduki. Beraz, egitasmoa egonkortu eta jarraipena eman nahi diote hobetu beharrekoa aztertu eta gastuak neurtu ondoren. “Proiektua trinkotu eta publiko berriei zabaldu behar diegu”, adierazi du.
