Mikel Etxaburu idazle ondarrutarrak jaso du Blas de Otero poesia saria
Mikel Etxaburu idazle ondarrutarraren Hirian zainetan 70 bat poema jasotzen dituen sortak irabazi du Blas de Otero VIII. Poesia Lehiaketako sari nagusia, euskal lanen kategorian. Gazteleraz idatzitako lanen artean, ostera, Ramon Perezen Gremios poema liburuak irabazi du sari nagusia. Saritu bakoitzak 5.500 euroko saria jaso du.
Etxabururen lanari dagokionez, epaimahaiak bertsoek niaren eta hiriko paisaiaren artean dagoen lotura erakusten duten modu berezia azpimarratu nahi izan du. “Emozioz betetako ibilbidea egiten duen ahots poetikoa du poema sortak”.
Bilboko Udaleko Kultur Sailak antolatzen duen lehiaketara aurten 449 behar aurkeztu dira, eta horietatik hamar euskara hutsean izan dira. Antolatzaileek nabarmendu dutenez, lehiaketaren helburua “literatura jarduera eta talentu berrien agerpena sustatzea” da.
Idazle ondarrutarrak HITZAri agertu dioenez, pozik jaso du saria. “Niretzako poema saria jasotzea pozgarria izan da, baina saria baino garrantzitsuagoa iruditu zait nik idatziko poema sorta batek epaimahaia bete duela eta gustuko izan dutela jakitea”.
Etxaburuk azpimarratu duenez, estreinako aurkeztu du lana sariketara. “Poema sorta berri honen sortze prozesua amaitu nuenean Blas de Otero sariketara lanak aurkezteko sasoiz nengoela ikusi nuen, eta sekula ez modura, aurten aurkeztea erabaki nuen”.
Oraingo honetan, gainera, irakurleak ohituta dituen gaitik “haratago joatea” erabaki du ondarrutarrak, erronka pertsonal modura. Argitaratu dituen aurreko bi lanetan, Zu zara orain txoria (Elkar, 2011) eta Hodeiak zapatetan (Susa, 2014), askatasuna eta horren falta izan dira ardatz, baina azken lanean hiriari buruz idaztea erabaki du. “Aspalditik nuen hiriari buruz idazteko gogoa”
Sorta agertzen diren poemei buruz galdetzean, horietako asko etxegabeek bizi duten errealitateari buruzkoak direla aurreratu du. “Gure inguru hurbilenean zer gertatzen denaren berri ematen saiatu naiz, nire ikuspuntutik. Bilbon gizi garen guztiok deskribatu nahi izan ditut, eta batez ere, hirian agertzen den guztia ikusten saiatu naiz. Izan ere, bertan gure artean bizi den jende bat, etxegabeak, esate baterako, gure begiraden aurrean ikusezin bihurtzen dira egunerokotasunean”.
Blas de Otero eta Miguel de Unamuno lehiaketako irabazleak. Mikel Etxaburu eskuinetik bigarren ageri da. Argazkia: Bilboko Udala
Mikel Etxaburu, Ondarroako Plaiko Zubiaren aurrean
