SOS Antxustegi plataformak agerraldi publikoa egin ahal izango du Bizkaiko Batzar Nagusietan

2016/01/12

Hainbat hilabetez eskaera egin ostean, Bizkaiko Batzar Nagusietako osoko bilkuran parte hartzeko aukera izango dute estreinako SOS Antxustegi plataformako kideek. Zehatz esanda, barikuan [urtarrilak 15], 09:30ean hasita egingo den saioan agerraldi publikoa egingo ahal izango dute.

Antxustegitarrak legebiltzarrean. Argazkia: EH Bildu legebiltzarra

Aukera berria ontzat eman dute plataformako kideek, eta pozik agertu dira. Hain zuzen ere, beraien ikuspuntua emateko aukera ezinhobea dela nabarmendu dute. “Orain arte gaia hainbat bidar eztabaidatu da Bizkaiko Batzar Nagusietan, baina ez dugu gure iritzia emateko aukerarik izan. Zentzu politikotik eztabaidatu da gaia, eta orain, ordea, esatekoak ditugunak gure ahotik entzungo dituzte”. Antxustegitarrek aurreratu dutenez, eskaera zehatz batekin joango dira. “Gure nahirik handiena Antxustegi salbatzea da, eta berau kultur ondare izendatzea eta babestea nahi dugu. Era berean, Antxustegi-ren inguruan egon diren txarto eginak eta esanak ere salatzeko asmoa dugu, horien inguruko erantzukizunak eskatuaz”. Proposamen berria Horrez gain, ontzia oraindik salba daitekeela sinetsita, batzarkideei proposamen berri bat egiteko asmoa badutela ere agertu dute. “Bizirik dirauen ontziola bat egitea proposatuko dugu, Antxustegi-ren ondoan. Tailer iraunkor modura planteatzen dugu. Etenik gabeko prozesu bat ereiten hasi nahi dugu, eta horretan, proiektu hori interesgarria iruditzen zaigu. Izan ere, gauza berriak irakasteko balio dezakeela uste dugu”.

SOS Antxustegi plataformako kideak Bilboko Itsasadarra Itsas Museoaren aurrean, protestan. Argazkia: Aitziber Laskibar

Proiektua aurrera ateratzeko baina, ontziaren zein proiektu berriaren ardura erakunde publikoek eta museoak hartu beharko lukeela uste du SOS Antxustegi plataformak. “Proiektu berriaren inguruko zirriborro bat eginda daukagu, eta hori ere barikuko agerpenean aurkezteko asmoa daukagu. Zaharberritze lanak kanpoan eta modu artisauan egitea proposatzen dugu, denen bistara. Horretarako bada, museoak dituen eta erabiltzen ez dituen baliabideak horretara bideratzea proposatu nahi dugu, eta konponketa lanak ekintza pedagogiko-didaktiko modura egitea, auzolanean, eta elkarlaneko tailer legez”. Egitasmo berri horregaz, Antxustegi arazo ordez, aukera modura ikustea nahi dute, baina berau aurrera ateratzeko, ordea, bertoko erakundeak tartean sartzea beharrezkoa dela azpimarratu dute Antxustegitarrek. Aditu asko horretan laguntzeko prest daudela ziurtatu dute, etorkizuneko artisauak formatu daitezkeela horrela, eta hiltzen ari den atunontzia elkarlanean egindako ikasketa eta kultur esperientzia berritzaile baten bidez salba daitekeela. Gero eta hondatuago Bestalde, Euskal Herriko atunontzirik zaharrenaren inguruan erabakiak hartzen jarraitzen duten bitartean, egiturak usteltzen jarraitzen duela gogorarazi nahi izan dute plataformako ordekariek. “Oso kaltetua dago, baina oraindik ere, hor jarraitzen du: zutik. Aurreko masta erori egin da eta bizkarra ere zeharo hondaratu dauka, azpia jota”.

Duela egun gutxi egurrezko atunontziak zeukan itxura. Argazkia: SOS Antxustegi plataforma

Ontzia babeste aldera, egitura estaltzea eta zama kentzea komenigarria dela aurreratu dute antxustegitarrek. “Jausi baino lehen, gainean daukan pisua kentzea hobe izango dela uste dugu”.