Bakearen Museoak inoiz baino bisitari gehiago izan ditu 2015. urtean
Ia 37.500 bisitari izan zituen iaz Bakearen Museoak. Bisitari kopuru handiena Europatik heldutako turistak izan dira. Iazko jardunaldiaren balorazio ona egin dute arduradunekUrtean-urtean bisitari kopuruan gora egin du Gernika-Lumoko Bakearen Museoak, ...
Ia 37.500 bisitari izan zituen iaz Bakearen Museoak. Bisitari kopuru handiena Europatik heldutako turistak izan dira. Iazko jardunaldiaren balorazio ona egin dute arduradunek
Urtean-urtean bisitari kopuruan gora egin du Gernika-Lumoko Bakearen Museoak, eta 2015eko datuek errekorra eman diote. 37.441 bisitari izan zituen Bakearen Museoak 2015. urtean, 2014an baino 3.354 gehiago.Urterik urte datuek gora egin dute, eta 2015era arte, 2007ko datuak ziren museoak batutako onenak. Hain zuzen, 35.000 bisitari zenbatu zituzten museoak Picassoren bozetoak hartu zituen urte hartan.
Hego Euskal Herrian eta Espainiako estatuan, Bakearen Museo bakarra da Gernika-Lumokoa, eta bisitarien aldetik ondo ikusita dagoela azaldu dute museoko arduradunek. «Jendeak ondo erantzuten jarraitzen du», dio museoko zuzendari Iratxe Momoitiok. «Gure museoak leku askotako bisitariak hartzen ditu urtean zehar, kanpokoak eta hemengoak. Hala ere, atzerritarren bisiten kopurua da beste museo batzuengandik bereizten gaituena».
2015. urtean 18.893 izan dira Europatik heldutako bisitariak; 2.374 Amerikako Estatu Batuetakoak; 1.007 Asiatik etorritako turistak eta 37 munduko beste toki batzuetakoak. Araba, Bizkai eta Gipuzkoako 7.134 bisitari izan zituen iaz Gernika-Lumoko Bakearen Museoak; eta Nafarroatik zein Espainiako estatutik heldutakoak 7.996 izan direla zehaztu dute.
Zinemaren eragina
Datu onak dira, beraz, 2015. urteak utzi dituenak. Baina, Momoitiok argitu duenez, Bakearen Museoarenak ez dira datu isolatuak. «Urte oso ona izan da turismorako bai Bizkaian zein Euskal Herri mailan ere». Dena den, onartu du Gernika-Lumoko Bakearen Museoa gero eta ezagunagoa dela, eta Bizkaira datozen turista askok bisitatzen dutela Bakearen Museoa.
2015ean, gainera, Espainiako estatuko ohikoak ez ziren lekuetako jendea ere izan dute museoan; adibide legez, Andaluziatik heldutako turistak jarri ditu Momoitiok. «Topikoak topiko, handik heldutako bisitari kopurua handiagoa izan da 2015ean, eta beraiekin komentatu izan dugunean erantzun digute Ocho apelidos vascos filmak Euskal Herria bisitatzeko gogoa piztu diela».
Dena den, urteroko pautak mantendu egin direla esan du Momoitiok. Uda partean familien bisitak izaten dira gehienak, eta negu partean taldeenak izaten dira ohikoenak.
Era berean, bakearen kultura eskola umeekin lantzeko asmoz, Museoa eskoletan izeneko programa eskaini du museoak 2014-2015 ikasturtean ere. Eskaintza Bizkai osora zabaldu dute; hala, eskola umeek bakearen kulturarekin lotutako tailerrak eskoletan lantzeko aukera izan dute, Gernika-Lumoko Bakearen Museoko hezkuntza arloko arduradunaren gidaritzapean.
Erakusketak baino gehiago
2015ean hiru erakusketa garrantzitsu hartu ditu Bakearen Museoak: Zibilizazioen arteko elkarrizketa, Ondarearen berreraikuntza gerraondoan: Regiones Devastadas Gernikan eta Bakea josiz: gatazka, arpillerak, memoria.
Hiru erakusketa bibliografiko ere jarri ditu 2015ean, nazioarte mailako bi mintegi antolatu ditu, MemoriaLab ekimena bultzatu du eta ikerketa lanekin jarraitu du, besteak beste.
