Ondarroako Liburuen Amuak irakurle klubak prest ditu hurrengo saioak
Abenduan eta urtarrilean atsedenaldia egin ostean, otsailaren 27an ekingo diote berriro Ondarroako Liburuen Amuak irakurle klubeko saio berriei. Ondarroako Udal Euskara batzordeak agertu duenez, prest dituzte maiatzera bitarteko hurrengo hiru saioak.
Ohi modura, hileko azken zapatuan batuko dira, 10:00etatik 12:00etara, Txomin Agirre udal liburutegian. Joxe Mari Urteagaren gidaritzapean, literatur zaleek liburu baten gainean jarduteko aukera edukiko dute.
Hurrengo hitzorduei dagokionez, lehenengoa, otsailaren 27an egingo da. Saio horretarako Ana Urkiza idazle ondarrutarraren azken lana aukeratu dute: Mamuak (Elkar, 2014). Euskara batzordeak aurreratu duenez, gainera, idazleak berak parte hartuko du saioan.
Bigarren saioa apirilaren 30ean egingo dute, eta saio horretan Iñigo Aranbarriren Apirila (Susa, 2014) izango dute mintzagai. Azkenik, maiatzaren 28an, Garazi Kamioren Orube abandonatuak (Elkar, 2014) landuko dute. Orube abandonatuak lanak, hain zuzen ere, Augustin Zubikarai nobela beka irabazi zuen 2013an.
Saioetan parte hartzeko edo informazio gehiago nahi izanez gero, galdetu Txomin Agirre udal liburutegian (94-683 33 43 / liburutegia@ondarroakoudala.net) edo Udal Euskara Zerbitzuan (94-683 36 68 / mrey@ondarroakoudala.net).
Ana Urkiza idazle ondarrutarra ‘Mamuak’ liburua aurkezten. Argazkia: Elkar
