Herritarrentzako egitarau zabala, otsailetik aurrera, Lekeitioko Galarrenan
Otsailetik aurrera ekimenez betetako egitarau zabala egongo da Lekeitioko Galarrenan. Asteburuetan izango dira batez ere ekimenak eta “ahalik eta herritar gehien hurbiltzeko moduko eskaintza” osatzen ahalegindu direla nabarmendu dute Galarrena Elkartekoek.
Momentuz otsailerako eta martxorako agenda diseinatu dute eta aurreratu dutenez, adin guztietako zein gustu ezberdinetako jendeak parte hartzeko moduko ekimenak egongo dira. Esate baterako, Imanol Ituiño magoaren emankizuna helduentzako, ipuin kontalaria txokolatadagaz lagunduta gaztetxoenentzako, Saharari buruzko hitzaldia bertako herritarra den Brahim Lambakiren eskutik. Izan ere, datozen bi hilabeteetan zehar, ia astero zerbait izango da Galarrenan. “Neguko egun hotzei lagun arteko giro epel eta atseginean aurre egin nahi dien herritar guztientzat”, esan dute antolatzaileek.
Egitarau zabal horregaz Galarrena taberna bat baino askoz gehiago dela berretsi nahi du Galarrena Elkarteak, eta herritarrentzat ateak zabal zabalik edukitzeaz gain, herriari ekarpen kultural, sozial zein politikoa egitea dituela helburu.
“Filosofia horren barruan ulertzen ditugu orain arte urteetan zehar Galarrenatik antolatu izan ditugun ekimen ezberdinak eta baita otsailean, martxoan zein hortik aurrera izango diren ekimen guztiak ere. Izan ere, nahiz eta gaurkoan otsaileko eta martxoko eskaintza aurkeztu, hortik aurrera ere ekimenak antolatzen jarraituko dugula azpimarratu nahi genuke”, azaldu dute. Izan ere, urtero, udaberri-uda parterako pala txapelketa prestatzen dute bai eta bestelako jarduera batzuk ere.
Lekeitiarrak Galarrenako neguko egitaraua aurkezten.
“Helburua, herritarrei gai ezberdinen inguruan harremantzeko espazioak erraztea eta zelanbaiteko eskaintza kultural, sozial zein politikoa egitea da eta”.Bestalde, Herriko tabernen egoera gogorarazi dute. “Ez genuke ahazterik nahi Españako epaitegi faxistek Galarrena eta beste ehundik gora Herriko Taberna zarratzeko agindua emana dutela, eta nahiz eta azken hilabeteetan gai hau isil antzean dagoen, epaitegien erabakia irmoa dela. Egitarau zabal honekin, hortaz, ozen esan nahi dugu ez gaudela tribunal zapaltzaileen aginduei men egiteko prest, eta herriarena dena lapurtzera datozen horiek aurrez aurre izango gaituztela beti”. Otsaileko lehen ekimena Inauteri egunean izango da. 20:00etatik aurrera parrillada ederraz gozatzeko aukera egongo da Galarrenan bertan, eta ekimen horretan zein hemendik aurrera egongo diren guztietan parte hartzeko gonbitea luzatu diete herritar guztiei. Galarrenako Neguko Egitaraua
