Inauteriak Ondarroa

2016/02/09

Ondarroako gazteenek martitzen karnabala bestelako eran ospatu behar izan dute gaur [otsailak 9]. Izan ere, atzo [otsailak 8], bertan behera geratu ziren kalez kale egin beharreko dantzak, eta hortaz, ikasleek euren ikastetxeetan egin behar izan dituzte azken egunotan prestatuko koreografia eta dantza bereziak. Hala ere, hiru ikastetxeetako ikasleek guztiek batera dantza egiteko aukera ere izan dute kiroldegian egin den diskotekan. DJ Mikel Egiluzek proposatutako abestiekin guztiek ere gerriak astintzeko aukera izan dute eguerdira arte. Nagusienak kiroldegiko kantxan dantzan ari ziren bitartean, ostera, txikienek horiek guztiak dantzan ikusteko aukera izan dute harmailetatik. Iluntzeko akularen enterruarekin agurtuko dituzte ondarrutarrek aurtengo inauteriak. Bestalde, zapatuan [otsailak 6] hasi zituzten inauteriak Ondarroan. Jaia, ofizialki, iluntzean egindako Lantzoi jaunaren irteerarekin hasiko bazen ere, eguerdiko orduetan giro berotzen aritu ziren herritarrak. Kresala Kultur Elkarteko kideek, esate baterako, bandak lagunduta kalez kale irten zuten dantzan lastozko txapel eta soineko koloretsuekin. Miel Otxinekin batera bateko zein besteko bazterrak alaitzen aritu ziren haize zakarrari aurre eginez. Iluntzean, aldiz, burrunbadarekin batera eman zioten ongietorria Lantzoi jaunari. Bi turrunek 20:00etan puntuan jo ostean, jaiak eztanda egin zuen Ondarroako kaleetan barrena. Herritarrak lantzoiaren atzetik dantzan ibili ziren kalejiran. Beste alde batetik, udalak antolatutako inauterietako tabernen eta denden apainketa lehiaketa Gaztedi tabernak eta Zuberoa okindegiak irabazi dute. Irabazleek 600 euro jasoko dituzte. Horrez gain, 100 euroko kontsolamendu sariak Beikozinik eta Gandiaga jantzi dendak jaso dituzte.