Aitor Etxeberriak irabazi du Ondarroako II. Arrigorri Bodyboard Txapelketa
Txapelketako olaturik onena Jon Haitz Badiola ondarrutarrak hartu du. Debako Zurrunbilo Surf Elkarteak, ostera, sari berezia jaso du. Txapelketagaz pozik agertu dira antolatzaileakDomekan Ondarroako hondartzan jokatu zen II. Arrigorri Bodyboard Txapelk...
Txapelketako olaturik onena Jon Haitz Badiola ondarrutarrak hartu du. Debako Zurrunbilo Surf Elkarteak, ostera, sari berezia jaso du. Txapelketagaz pozik agertu dira antolatzaileak
Domekan Ondarroako hondartzan jokatu zen II. Arrigorri Bodyboard Txapelketa Aitor Etxeberria ondarrutarrak irabazi du. Parte hartu zuten 14 lagunen arteko lehia handia izan bazen ere, Eskilantxarri Ur Kirol Elkarteko kideak lortu zuen sari nagusia.Antolatzaileek nabarmendu dutenez, jokatu ziren txanda guztietan lehia estua egon zen. «Txapelketan puntuatzen egon diren epaileen iritziz, oso txapelketa estua eta lehiatua izan zen. Deba Zurrunbilo Surf elkartetik etorritako lau gonbidatuek maila ona erakutsi zuten, eta Ondarroako eta Debako elkarteen arteko lehia bizia egon zen uretan, azken momentura arte».
Datorren urtera begira, esperientzia errepikatzeko asmoa agertu dute Eskilantxarrikoek. «Dauzkagun baliabideak eta itsasoak eman zituen aukerak ikusita, egun ederra pasa genuen. Eguzkia eta olatuak gure alde egon ziren, eta arratsalde paregabe bat igaro genuen. Benetan egun borobila izan zen, berriro errepikatzeko modukoa. Antolatzaileak eta parte hartzaileak oso gustura geratu ginen lortutako emaitzarekin».
Ikusle asko
Txapelketari dagokionez, 13:30ean hasi, eta 18:00etan amaitu zen. Txapelketak iraun zuen tartean, giro ona egon zen Arrigorri hondartza eta inguruetan. DJ Anabasak musikaz girotu zuen txapelketa, eta nahi izan zuenak eztarriak busti eta urdailak asetzeko aukera ere izan zuen. Antolatzaileek nabarmendu dutenez, gainera, nahikoa ikusle hurreratu ziren parte hartzaileak animatu eta giroagaz gozatzera.
Hamalau lehiakidek hasi zuten txapelketa, eta txandak aurrera joan ahala, finalera ailegatzeko lehia handitzen joan zela azpimarratu dute parte hartzaileek. «Finala hurreratzen joan zen heinean, lehiakideon arteko tentsioa handitzen hasi zen».
Finalaurrekoetan euren kontrako lehiakideak mendean hartu ostean, honako laurak izan ziren finalistak: Aitor Etxeberria, Fermin Txurruka, Raul Cordon eta Jon Haitz Badiola. Guztiek jaso zuten Eskilantxarrikoen eskutik oroigarri berezia.
Horrez gain, beste bi sari ere banatu zituzten. Olaturik onenaren saria Jon Haitz Badiolak jaso zuen, eta Debako Zurrunbilo Sur Elkarteari sari berezia eman zioten.
