Ondarroako judokek hiru domina lortu dituzte Gipuzkoako txapelketan
Ondarroako Artibai Judo taldeko judokek sasoiko daudela erakutsi dute Gipuzkoako Ne waza judo txapelketan. Lurreko judoa deritzon diziplinan, hain zuzen ere, hiru domina lortu dituzte ondarrutarrek.
Luis Ferreño Artibai taldeko entrenatzaileak azaldu duenez, taldeko hiru lagunek lehiatu zuten txapelketan, eta guztiak dominekin bueltatu dira. “Klubeko kideok oso pozik gaude lortutako emaitzagaz. Jendea lehiatzeko animatuta ikusten dugu, eta aurrerantzean ere, horrelako markak lortzeko lanean jarraituko dugu”.
Dominei dagokienez, bi urrezko eta zilarrezko bat lortu zituzten txapelketara aurkeztu ziren hiru judokek. Ibon Marrerok, esate baterako, beterano mailan urrezko domina lortu zuen, 65 kiloz azpiko kategorian. Julen Duñabeitiak, ostera, senior mailan lortu zuen urrezkoa, 95 kiloz azpiko kategorian. Azkenik, Jon Lasartek zilarrezko domina lortu zuen senior mailan, 85 kiloz azpiko kategorian.
Bestalde, eta Artibaiko entrenatzaileak aurreratu duenez, hurrengo asteotan Gasteizen eta Madrilen (Espainia) jokatuko diren beteranoen kopako probetan parte hartuko du Ibon Marrerok. “Txapelketa bi horietarako prestatzen ari gara”.
Lasarte, Duñabeitia eta Marrero dominekin, Luis Ferreño entrenatzailegaz batera. Argazkia: Artibai Judo Taldea
