Kantu bazkaria egingo da, estreinako, Ondarroan
Zubi Zahar herri ikastolak antolatuta, zapatuan [otsailak 20] kantu bazkaria egingo da Ondarroako Arrigorri Ostatuan. Antolatzaileek nabarmendu dutenez, herrian horrelako ekimena egingo den estreinako aldia izango da. “Aurretik bertso bazkariak eta antzeko beste hainbat ekimen egin izan ohi ditugu, eta orain kantu bazkariaren aldeko apustua egin dugu. Nafarroa aldean sekulako arrakasta dute horrelako kantu bazkariek, eta herrian eta eskualdean kantu zaletasun handia dagoela ikusita, esperientzia hona ekartzea erabaki dugu. Herritar guztiak bertan parte hartzera gonbidatu nahi ditugu”.
14:30ean izango da bazkaria, baina bazkaritan batuko direnek aurretik jarrita dute hitzordua, “geroko girotzen joateko”. 13:00etan Alamedan batu eta kalerik kale kantuan ibiliko dira kantu bazkaria girotuko duten Angel Marizkurrena abeslaria eta Aitor Ibarra Jalisco eta Francisco Santxotena musikariekin batera. “Eguraldiaren iragarpenaren arabera, eguraldi ona egongo da. Hortaz, kaleak giro onez betetzeko aukera izango dugu”.
Kalerik kale ibili ostean, bazkaritara joango dira. Antolatzaileek aurreratu dutenez, etxean eta bertoko produktuekin egindako menua izango dute kantu zaleek aukeran. “Bazkaria geuk prestatuko dudu etxean, eta ondoren, Arrigorrira eramango dugu”. Menuari dagokionez, honakoa izango da: patatak errioxar erara, oilaskoa letxugarekin, jogurta, edaria eta kafea.
Bazkaldu ostean, iluntzera arte kantuan jarraitzeko aukera egongo da, eta tartean, ezustekoaren bat edo beste ere egon ahal dela iragarri dute antolatzaileek.
Ekimenari dagokionez, datorren urtean ere antzeko ekimena egiteko asmoa agertu dute. “Gure asmoa, aurtengoak ondo irtetzen baldin badu, ekimena urtero egitea da, eta bide batez jende desberdina gonbidatu abestera. Horrelako ekimena antolatzen dugun lehen aldia da, orain ikusi egin beharko da zelako erantzuna duen”.
Bertan parte hartu nahi dutenek bihar [otsailak 18] iluntzera arte salgai izango dituzte txartelak Kurike, Garoa eta Irkaitzen. 20 euroren truke, gainera, hainbat kantu biltzen dituen kantu liburuxka jasoko du opari parte hartzaile bakoitzak. Bestalde, antolatzaileek gogorarazi dutenez, 14 urtetik gorakoentzat izango da ekimena.
Egitaraua
Behean, Markina-Xemeinen egindako bigarren kantu bazkariko irudiak
Markina-Xemeinen egindako kantu bazkarian, dantzan
Markina-Xemeinen egindako kantu bazkaria. Argazkian, Angel Mariezkurrena eta musikariak: Aitor Ibarra ‘Jalisco’ eta Francisco Santxotena
