Lekeitioko Kideguneko zerbitzua banatu egingo da, haur kopuru handiaren ondorioz
Lekittoko Aisialdi Taldea arrakasta handia izaten ari da Kidegune zerbitzuan, jakitera eman dutenez, etortzen diren ume kopuruak gorakada handia izan du azken hilabeteetan. Datu hau oso positiboa den arren, alde txar bat ere badaukala azaldu dute, izan ere kalitatezko programazio bat eskaintzeko arazoak sortzen dizkiete. “Haur kopuru handi honek trabak sortzen ditu zerbitzuaren funtzionamenduan, alde batetik, eraikinean horrenbeste haur ezin direlako sartu eta beste aldetik, ezinezkoa delako ume kopuru handi honentzako ekintza, jolas eta bestelakoak antolatzea, batez ere udalak aurreko urtean zegoen errefortzuzko hezitzailea kendu ostean, egoera ekonomikoaren ondorioz”, azaldu dute.
Lekeitioko Kideguneko umeak altxorraren bila meriendan. Argazkia: Aisialdi Taldea
Hori dela eta, guraso bilera deitu zuten, eta zapatu honetatik aurrera, zapatuetako zerbitzua bi zatitan banatuko da. Horrela, 17:00etatik 18:30etara 9 eta 11 urte bitarteko umeak egongo dira zerbitzuan, eta 18:30etik 20:00etara 6 eta 8 urte bitartekoak. Hilabete bat igarotakoan, adin tarteak txandakatu egingo dira, 6 eta 8 urte bitartekoak 17:00etan sartuz eta 9 eta 11 bitartekoak 18:30etan.
Informazio hau eta gehiago gurasoei helarazteko hainbat WhatsApp talde sortzen ari dela jakitera eman du Aisialdi Taldeak. Hori dela eta, talde hauetan egon nahi duten gurasoei deia egiten diete kidegunean euren telefono zenbakiak emateko.
