Ondarroako ertzain etxearen birmoldatze proiektua aurkeztu du Beltran de Heredia sailburuak
Estefania Beltran de Heredia Eusko Jaurlaritzako Segurtasuneko sailburuak gaur [otsailak 17] aurkeztu du Ondarroako ertzain etxea eraberritzeko eta birmoldatzeko proiektu berria. Lan horien helburu nagusia “herritarrei zerbitzua hurbiltzea eta arreta hobetzea” dela nabarmendu du sailburuak.
Birmoldaketa lanek 365.177,42 euroko kostua izango dute eta lau hilabeteko epean burutuko dira, horiek esleitu ostean. Beltran de Herediak azpimarratu duenez, inguruko espazio perimetral guztia modaltuko dute. Besteak beste, eraikinaren aurreko aldea guztiz itxuraldatuko da eta eraikinak hasiera baten zuen itxura hartuko du, hau da, berau babesten duten harrizko hormarik gabe. Ekialdean horma zati bat mantenduko da eraikinaren akustika babesteko, eta beste perimetro guztia babesteko egitura metaliko bat erabiliko da.
Lanen ostean, gainera, 50 metro koadro gehiago irabaziko ditu espazioak. Orain 3.682,42 metro koadro ditu, eta gero, 3.732,37 izango ditu. Sailburuaren iritziz, eraikinak funtzionaltasunean irabaziko du. “Eraikinak funtzionaltasuna irabaziko du, zerbitzua herritarrengana hurbilduz. Herritarrek, esate baterako, kaletik zuzenean edukiko dute bertarako sarrera”.
Horizonte 2016 plan estragikoaren barruan
Lanei dagokionez, horiek Horizonte 2016 plan estrategikoaren barruan egingo direla nabarmendu du Segurtasun sailburuak. Plan horretan aurreikusitako hobekuntza guztien artean, hainbat ertzain etxe birmoldatzea erabaki da, zentro horiek “adeitsuagoak, atseginagoak eta herritarrekiko komunikazio eta zerbitzuaren premien erantzuteko irekiagoak” izan daitezen.
Sailburuak gogoratu duenez, 2008ko irailean jasandako eraso terroristaren ostean, eta beste eraso batzuk ekidin nahian, salbuespen neurriak hartu zituzten. Horren adibide, Ondarroako eraikina guztiz babesten zuten hormak eraiki zituzten. “ETAren eraso terroristek autobabeserako neurri apartekoak hartzera behartu zuen Ertzaintza ere. Eraikinaren eta barruan jarduten zutenen segurtasuna lehenetsi zen, poliziak herritarrei eskainitako beste balio batzuen gainetik. Ondarroako ertzain etxea, argi eta garbi, horren erakusgarria da”.
Gaur egungo eta 2008ko testuingurua guztiz desberdinak direla kontutan hartuta, zerbitzua orain “herritarrei gerturatzea” erabaki dutela adierazi du Beltran de Herediak. “Horizonte 2016 deritzon plan estrategikoaren barruan, eredu polizial berri baten egin dugun apustua eta gero, Ondarroako ertzain etxeari hasiera batean zuen itxura emateko unea orain izan behar zuela iruditu zaigu. Proiektuaren helburua bikoitza da: alde batetik, eraikinaren itxitura arinduko dugu, eta bestetik, beste edozein zerbitzu publiko modura, harrera herritarrengana hurbilduko dugu, espazio funtzionalagoa eta erakargarriagoa eginez.
Estefania Beltran de Heredia, gaur, azalpenak ematen Ondarroan. Bere aurrean, Josu Zubiaga eta Iñaki Gurtubai ageri dira, Ertzantzako beste agintarigaz batera
Estefania Beltran de Heredia azalpenak ematen, atzean, Ondarroako ertzain etxeak izango duen itxura berria
