2016 Bideak lehen pausoak eman ditu Bizkaian

Eider Mugartegi.

2016/04/12

Donostia 2016 Europako Kultur Hiriburuaren 2016 Bidea egitasmoak bere lehen pausoak eman ditu Bizkaian. Domekan [apirilak 10], eguraldi ona lagun, Debatik Markina-Xemeinera artean egin zen hirugarren etapak mendizale ugari bildu zituen. Markina-Xemeingo Artibai Mendigoizale Taldearen gidaritzapean, Mutrikuko mendietan zehar ailegatu ziren Markina-Xemeinera leku guztietako ibiltariak.

2016 Bidearen 3. etapako parte hartzaileak Arretxinagako bisita gidatuan.

Ibilian egiten da kultura izenburupean, mendizaletasuna eta kultura uztartzen ditu 2016 Bidea proiektuak. Guztira gidatutako 32 mendi etapa izango dira eta 100 ekintza kultural, eta euretatik bost Bizkaian egingo dira. Etapa bakoitza, gainera, kultur alor bateri lotua egongo da. 3. etapa, Soinu-banda naturalak izenagaz, musikari lotuta egon da, eta bere baitan, hiru ekimenez gozatzeko aukera izan zuten domekako parte hartzaileek. Horrela, Deban hasitako ibilbidearen lehen geldialdia Mutrikuko Kalbarioko ermitan izan zen. Bertan, Mutrikuko Soka taldeak, Ganbara Musikak eta Folk taldeak emanaldi berezia eskaini zuten. «Zoragarria» ibiltarien esanetan. Ibilbide erdian egin zen bigarren geldialdia, Kostolamendin, eta trikitixa, akordeoi doinuekin euskal musika eta bertsio ezberdinak entzuteko aukera izan zuten mendizaleek.

Mendizaleak Arretxinagako harrien azpitik igarotzen.

Bidean bazkalduta, 16:30ak inguruan ailegatu ziren 3. etapako parte hartzaileak Markina-Xemeinera, eta Juanjo Txurruka udalerriko alkatearen ongi etorria jasota, Markina-Xemeinen eskaintzen diren bisita gidatuetako bat egiteko aukera izan zuten. Horrela, Arretxinagako San Miguel baselizaren historia ezagutu eta hiru haitz handien azpitik ere igaro ziren batzuk, kondairak dioen modura, bikotea aurkitzeko. Egunari amaiera emateko, kontzertu erraldoi bat egon zen Xemeingo elizan Mutrikuko Udal Musika Eskolako Banda Txiki, Trikitixa eta abesbatzetako ikasle eta Markina-Xemeingo Xemein Abesbatza, Emeki Korala eta Xemein Gazte Ahots abesbatzen eskutik. Proiektu gehiago Donostia Europako Kultur Hiriburu izanak, Euskal Herri osoan eragingo duela erakusten ari da 2016 Bidea. Baina, ez da mugak gaindituko dituen proiektu bakarra izango. Izan ere, horrez gain, beste egitasmo batzuetan parte hartuko dute Lea-Artibai, Mutriku eta Busturialdeko herriek. Europa bat batean eta Emusik proiektuekin bat egingo du Markina-Xemeinek, esate baterako. Alde batetik, Europako inprobisatzailerik onenek Donostian izango dute hitzordua, Europako kulturen ahozko tradizioen nazioarteko topaketan, baina, aurretiko jardunaldi batzuk egingo dira Euskal Herrian zehar, euretako bat, apirilaren 21ean Markina-Xemeinen. Bina sardiniar eta kurdu, bertoko bertsolariekin batera, Kontzekupeko oholtzara igoko dira, 19:00etan, musikariez lagunduta, kulturen arteko elkarrizketa batean, zenbait tradizio taularatzeko.

Mutrikuko eta Markina-Xemeingo abesbatza eta musikariak Xemeingo parrokian eskaini zuten emanaldian.

Bestalde, maiatzaren 5ean, Emusik musika jaialdiaren baitan, munduko 200 musikarik igaroko dute asteburu osoa udalerrian, eta kontzertuak emango dituzte bai herrian zein ikastetxeetan. Emusik Europako Musika Eskolen Elkarteak antolatutako jaialdia Donostian izango dela aprobetxatuta, 2016ko maiatzaren 6an eta 7an, 5.000 musikari gazte baino gehiago bilduko dira Donostian, Euskal Herriko beste hainbat musikarigaz batera aritzeko. Mutrikuarrek ere partaidetza zuzena izango dute Donostian egingo den kontzertu erraldoian bai eta herrian bertan eskainiko den kontzertu berezian. Alemania eta Herrialde Katalanetako musikariak etorriko dira Mutrikura, hain zuzen. Herrialde Katalanetako Perkusio Taldea eta Big Banda eta Alemaniako banda egongo dira, besteak beste, Ondarroan, maiatzaren 6an, eta talde bera joango da Bermeora hurrengo egunean. 4. etapa, Markina-Xemeindik Gernika-Lumora Larrua lurraren kontra izena izango du datorren domekan [apirilak 17], Markina-Xemeindik Gernika-Lumora egingo den 2016 Bidea egitasmoko 4. etapak. Herri batean zein bestean frontoiak eta pilotak izan duen garrantzia nabarmentzen dela argitu zuen, Bizkaiko tartearen aurkezpenean, Xabier Paya Donostia 2016ren kultur programaren zuzendariak. Guztira 25 kilometro izango dira, eta lau ekitaldi kultur berezi. Etaparen hasiera 09:00etan izango da, Markina-Xemeingo Kareaga industrigunetik. Ziortza-Bolibar, Munitibar, Mendata, eta Arratzutik igaroko dira ibiltariak Gernika-Lumora ailegatzeko. Rober Garay artistaren eskutik Land Art ibilbidea ezagutzeko aukera izango dute parte hartzaileek. Ziortza-Bolibarko plazan izango da Rober Garayren lehen esku-hartzea; Land art-en landuko den kontzeptu orokorra azalduko du. Munitibarko plazan izango da bigarren geldialdia, eta bertan artea paisaiaren interpretazioaren arabera azalduko du, eta azkenik, Arratzuko Elexalde auzoan egingo den hirugarren geldialdian Land art obraren sorkuntza erakutsiko du. Behin Gernika-Lumora ailegatuta burutuko da azken ekitaldia. Gernikako Jaia Alai frontoira joan eta zesta-punta erakustaldia eta tailer bat edukiko dituzte parte hartzaileek. Etapa guztietan modura, autobusak egongo dira Donostiatik, baina Busturialdeko eta Lea-Artibaiko herrietatik igaroko den bat ere egongo da, bertako herritarrak batu eta etaparen hasierara eramateko. Autobusak 08:30ean irtengo du Markina-Xemeindik.