Diru laguntza gabe geratuta, aurten ez dute Mendexan abentura parkea egingo
Abentura parkea egiteko lanak hasita daude; lehen fasea bukatu zuten, baina, lanak amaitzeko nahikoa diru ez duela izango jakitera eman du Mendexako udalak. Izan ere, Eusko Jaurlaritzatik udalari adierazi berri diotenez, ez dute 235.000 euro inguruko diru-laguntza jasoko, eta beraz, ezinezkoa da proiektuagaz aurrera jarraitzea.
Orotara 500.000 euroko aurrekontua zuen proiektuak, eta udalak Eusko Jaurlaritzaren eta Bizkaiko Foru Aldundiaren laguntzagaz egiteko asmoa zuen.
“Aurreko fasea burutzeko Jaurlaritzak %80a eman zigun, eta Aldundiak %20a, baina, orain Jaurlaritzaren ezezkoa jaso dugu. Hala ere, laster diru-laguntza deialdi berri bat deituko dutela esan dute eta guk orduan eskaera bideratuko dugu, eta ea datorren urtean zabaltzen dugun abentura parkea”, zehaztu du Jesus Mari Anakabe Mendexako alkateak. Bigarren faseagaz batera, gainera, parkeko kudeaketa lehiaketara ateratzeko asmoa zuen udalak.
Jaurlaritzaren laguntza jasoko zutela ziurtatzean, Aldundira jotzeko asmoa zuten falta zen zatia eskatzeko, baina, Jaurlaritzaren diru gabe geratu direnez, ez dute momentuz Aldundira joko.
Mendexako Leagi auzoan dagoeneko abentura parkea izango dena hesituta dago, aparkalekua ere egokitu zuten, eta instalazioentzako pare bat etxola ere badaude bertan. Era berean, aldagelak, komunak, ur hornikuntza eta argiteria ere jarrita daudela azaldu du udalerriko alkateak: “Pena da, gure asmoa laster bukatzea zen, baina, momentuz ezinezkoa da, espero dugu datorren urtea parkea zabaldu ahal izatea”.
Turismoa bultzatzea helburu
Bertako turismoa bultzatu asmoz, Sopuertan dagoen parkearen antzerakoa egin nahi dute. Umeek zein nagusiek gozatu ahalko dute parkean. Zailtasunaren arabera sailkatutako bost mailatako erronkak bilduko ditu azpiegitura berriak: tirolinak, tibetar zubiak, jokuak, arbola bitarteko ibilbideak…
Gainera, gerora, eta parkeak duen arrakasta ikusita, jan-edanerako txosna bat jartzeko ideian ere pentsatu dute; betiere, “eskabideen arabera”. Lehenengo urtea, hala ere, “parkea ezagutzera emateko” aprobetxatuko dute. Behin zabalik, urtean zortzi bat hilabetez eman nahi dute zerbitzua, eta neguan, mantenu-lanak egingo omen dituzte.
Denbora tarte horretan, inguruko edota urrunagoko herritarren aukera izatea ez ezik, eskoletako ikasleen irteeretako bat ere izatea bilatuko du abentura parkeak.
Duela zenbait urte, Turismoko Plan Estrategikoa landu zuen Mendexako Udalak, eta orduan, herriko turismo aktiboa sustatzeko asmoz, abentura parke bat egiteko beharrizana ikusi zuten, beste hainbaten artean. Herrian aukerak ematea da, batetik, udalak bilatzen duena, eta, bestetik, jendea herrira erakartzea.
Lehen faseko lanak urtarrilean bukatu zituzten.
