Turismo datuak hobetu nahi ditu Lekeitioko Udalak
2016ko Aste Santuko turismo datuak iaz bezala mantendu badira ere, horiek hobetzeko ahalegina egin nahi du Lekeitioko Udalak. Datu horiek hobetzeko asmoz, turismoan zeresana daukaten eragileekin jarraipen mahaiak deituko ditu udalak, “etorkizuna elkarlanean jorratzeko”. Beraz, ostalari, ostatuetako nagusi, merkatari eta ekintza enpresei, besteak beste, mahai horietan parte hartzeko deia egin diete.
Aurtengo Aste Santuan (martxoaren 24tik 28ra) 810 bisitari hurbildu dira Lekeitioko turismo bulegora: eguenean 201 bisitari joan ziren, barikuan 256 bisitari, zapatuan 215 bisitari, domekan 110 bisitari eta astelehenean 28 bisitari.
Lekeitioko plaza.
Jatorriei dagokienez, espainiar estatukoak dira bisitari gehienak; atzerritar kopurua, berriz, murriztu egin dela jakitera eman dute. Bisitarien %42 Hego Euskal Herritik etorri da , %48 espainiar estatutik eta %9 atzerritik.
Santa Katalinako Itsasargiak eta Marierrotak ere hainbat bisitari erakarri dituzte, Itsasargia 100% okupaziora ere heldu delarik, hau da, 266 bisitari izatera (iaz baino %26a gehiago). Marierrotak, ostera, 49 bisita eduki ditu.
Santa Katalina Itsasargia
Urtean zehar ere, turismo kulturala eskaintzea posiblea dela adierazi du udalak. “Lekeitiarra izatearen harrotasuna transmititzen duena. Gure jatorria, iragana eta gure kultura islatzen dituena, elementu bereizle bezala, itsasoarekin, arrantzarekin, itsas jarduerarekin eta itsasoak historiaren zehar, eta baita gaur egun ematen digun guztiari garrantzia ematen duena”.
