Urre bat eta zilar bi lortu ditu Lekeitioko Tximista atletismo taldeak

Eider Mugartegi.

2016/04/12

Joan den asteburuan Durangon lehiatu diren Bizkaiko 20 urte azpiko eta erreleboetako lasterketetan emaitza bikainak lortu ditu Lekeitioko Tximista atletismo taldeak. 4×300 erreleboetan urrea irabazi zuten eta taldeka eta 4×100 erreleboetan zilarra.

Tximista atletismo taldekoak Durangoko atletismo pistan. Argazkia: Tximista

Taldekako bigarren postuagaz oso pozik geratu dira Tximistakoak. “Aurretik Durangoko Bidezabal taldea izan dugu bakarrik, Espainiako ligan parte hartzen duen taldea”, esan dute. Tximistak abiadurako hamar probatan eta erreleboko lasterketa bitan parte hartu zuen eta lehen postu bat, bost bigarren postu, hirugarren postu bat, laugarren postu bi, bosgarren postu bat eta hamargarren postu bat lortu zituen. Taldeko neska-mutilek erreleboetan lortutako postu bikainak ere nabarmendu dituzte Tximistakoek. “4×100 metroko lasterketan bigarren postuan geratu ziren Irati Agirregomezkorta, Olatz Martiartu, Ainara Plaza eta Carla Alonso eta 4×300 metroko lasterketan lehen postua irabazi zuten Ainara Plazak, Irati Agirregomezkortak, Naiara Virtok eta Karla Balenciagak”.

Tximista atletismo taldekoak dominak irabazita. Argazkia: Tximista

Nahiz eta atleta guztiek ez zuten parte hartzeko aukerarik izan, Durangon egon ziren taldekideak animatzen, eta euren presentzia eskertu eta atleta guztiak zoriondu dituzte taldeko arduradunek. Hurrengo proba garrantzitsua bi aste barru izango du taldeak, Donostian. Euskadiko Taldekako Txapelketa jokatuko da bertan.