Jaitsiera postuak atzean laga ditu Aurrerak, behin-behinean
Zapatuan [apirilak 16] Aurrera Vitoriaren aurka 2-0 irabazi ostean, sailkapen taulan gorako bidean jarraitzen dute Ondarroako Aurrerako nagusiek, eta hartara, jaitsiera postuetatik ateratzea lortu dute.
Azken hiru puntuei esker, 3. mailan geratzeko aukerak nabarmen gehitu dira. Orain momentuan, 36 puntugaz, sailkapen nagusian 17. postuan dago talde ondarrutarra, eta hurrengo sailkatuekiko tartea handiagotzea lortu dute.
Mikel Etxaburu Pixki-ren eta Joseba Plazaren mutilek, hain zuzen ere, hil ala biziko partida jokatu zuten Zaldupen Aurrera Vitoriaren aurka, eta beste behin ere, eta presioari aurre eginda, ondo erantzun zuten.
Partidaren lehen zatian etxeko taldeak ez zuen bere jokoa egiteko aukerarik eduki, eta aurkariek gol aukeraren bat edo beste izan bazuten ere, Aurrerako atezainak markagailua hutsean mantentzea lortu zuen. Husnako berdinketagaz amaitu zen lehen zatia.
Atsedenaldia eta gero, talde ondarrutarra gogotsu bueltatu zen zelaira. Bere jokoa egitea lortu zuen taldeak, eta 62. minutuan sartu zuen lehen gola Julen Arufek. Lehen tantoak dena aldatu zuen, eta ordutik aurrera, Zaldupera hurreratutako zaleen artean zoramena nagusitu zen.
Etxeko taldeak golaren bila jarraitu zuen hurrengo minutuetan ere, eta 80. minutuan Unai Jauregik bigarren gola sartu zuen korner jaurtiketa baten ostean, buruz errematatuta.
Beste behin ere, zaleek ez zuten hutsik egin, eta Zaldupe jendez bete zen zapatuan. Zaleen babes hori eskertzekoa dela nabarmendu du talde teknikoak. “Iazko denboraldian goiko postuetan geundela zaleek ematen ziguten babesa orain beheko postuetan gaudela ematen diguten berdina eta, eta hori da garrantzitsuena, onean eta txarrean taldea eta zaletuak bat eginda egotea”.
Asteburuan Getxoren aurka jokatu dute, eta talde teknikoak aurreratu duenez, partida prestatzen hasita daude. “Oraindik ez da ezer lortu, eta lanean jarraitu beharra dago”. Entrenatzaileen esanetan, lanean gogor jarraitzeak “bakarrik” emango du hurrengo partida irabazteko aukera, “eta ez beste ezerk”.
Zapatuko partidako jokaldi bat
Zapatuko jokaldi bat
Aurrera Ondarroa vs Aurre Vitoria
