Euskal kofradiek barikuetan arrainik ez saltzea erabaki dute, behin-behinean
Antxoaren kostera luzatu nahian, barikuetan arrainik ez saltzea erabaki dute euskal kofradietako ordezkariek. Egunotako harrapaketa kopuruak oso handiak izan direla kontutan hartuta, neurri hori hartzea adostu dute, eta hortaz, gaurtik [apirilak 28] astelehenera [maiatzak 2] bitartean, ez da ontzirik itsasoratuko.
Ondarroako kofradiako ordezkariek nabarmendu dutenez, erabakia behin-behinekoa izango da. “Hemendik eta antxoa kostera amaiera arte, gure asmoa barikuero bandera ipintzea da, baina hori, astero baloratzen joango gara, harrapaketen arabera. Neurri honegaz, gainera, antxoari bere balioa eman eta merkatua ere liberatu nahi dugu”.
Hain zuzen ere, azken asteotan bost benta ere egin dira, eta neurri horregaz, benta bat gutxituta, antxoaren kostera zer edo zer luzatu nahi dute. Kostera ekainaren amaieran amaitu ohi da, baina aurten daraman martxarekin, arinago amaitzea ere aurreikusten da. Oraingoz, hilabetean, kuotaren %66a arrantzatu dute baxurako ontziek.
Antxoa harrapaketei dagokienez, egunotan antxoa asko saldu da Ondarroan, 882 tona inguru, guztira. Kopurua handia izan denez, gainera, prezioak nabarmen amildu dira bentan. Kiloa euroaren bueltan saldu da.
Batez ere, astelehenean [apirilak 25] eta martitzenean [apirilak 26] deskargatu zen kopururik handiena. Astelehen goizean itsasoratu ziren ontziak, eta arratsaldeko lehen orduetarako, antxoa asko deskargatu zuten 331.000 kilo inguru. Iluntzean barriro itsasoratu, eta martitzen goizean, oraindik eta antxoa gehiago deskargatu zuten portuan, 431.000 kilo inguru.
Egoera horrek, zehazki, kaosa eragin zuen Ondarroako portuan, eta inoiz ez modura, antxoa saldu barik ere geratu zen. Besteak beste, antxoaren prezioa erabat amildu zen, arrain kaxak amaitu egin ziren, eta izotz barik ere geratu ziren kofradian. “Izotz fabrika itxita dagoen bitartean, ahal dugun modura ari gara antolatzen, eta izotza beste portuetatik (Colindres, Getaria, Bermeo, Lekeitio) ekarri bagenuen ere, ez zen nahikoa izan. Gure aurreikuspenak martitzenera begira ziren, baina astelehenean deskargatu zen arrain kopurua hain handia izanda, kaxa existentzia guztiak eta izotza astelehenean bertan amaitu ziren. Eta martitzenean, arraina beste horrenbeste eta gehiago egon zenez, ez genuen horri guztiari aurre egiteko nahikoa azpiegiturarik eduki”.
Hori dela eta, atzo [apirilak 27] ez zen bentarik egin Ondarroan. “Nahikoa izotz eta kaxa eduki izan bagenitu, egingo genuen beharra”.
Gaur [apirilak 28], ordea, zer edo zer antxoa gutxiago lehorreratu dute, 120.000 kilo inguru. Prezio aldetik gainera, garestiago saldu da; bataz beste, 1,23 euroan, kiloa. Alerik txikienak 60 zentimo inguruan saldu dira, eta handienak, ostera, 3 euroren bueltan kiloa.
Antxoa hain merke egonda, gainera, tartean berdel ale batzuk ere harrapatu dituzte, oraindik kuota zuten ontziek. Berdel gutxi egoneran, nahikoa prezio onean saldu da; kiloa 1,10 eta 1,20 bitartean.
Baxurako arrantzaleak antxoa deskargatzen, gaur goizean, Ondarroan
Arrantzaleak antxoa deskargatzen Ondarroako portuan
Baxurako arrantzaleak antxoa kaxak karriatzen
