Lan istripuetan hildakoak gogoratu dituzte Ondarroan, Lan Osasunaren Nazioarteko Egunean
Gaur [apirilak 28], Lan Osasunaren Nazioarteko Egunean, mobilizazioak egin dituzte sindikatuek. Egin dituzten mobilizazio horietako bat Ondarroan egin du LABek. Bertan, besteak beste, lan osasunaren defentsarako borroka aldarrikatu dute kalez kale, eta azken urtean langileariaren lan baldintzak okertu ere egin direla salatu dute.
Hain zuzen ere, Ondarroan lanean hildako langileen oroimenez giza katea egin dute, eta ekimen horregaz “prekarietateak gaixotu eta hil egiten duela” salatu nahi izan dute, Prekarietateak hiltzen gaitu lelopean. Ekimena portuaren sarrerako biribilgunean amaitu da, eta bertan, 17 kandela piztu dituzte; aurten hildako langile bakoitzeko bana.
LABeko ordezkariek lan istripuren baten ondorioz hil diren langile kopurua gorantz doala salatu dute, eta egoera aldatzeko neurriak hartzeko exijitu dute. Iaz, 55 heriotza istripu izan ziren, eta aurten, oraingoz, 17 dira hildakoak. Horietako hiru, Ondarroako portuagaz oso lotuta zeuden langileak izan dira, eta horregatik, mobilizazioa Ondarroako portuan amaitzea erabaki dute.
Heriotzez gain, lanean gaixotu egiten dela ere salatu nahi izan dute. “Lanean erabilitako produktuengatik (amiantoa, silizea…) gaixotu diren langileen zerrenda luzea da, baita hil diren langile kopurua ere. Adibidez, amiantoak eragindako gaixotasunen ondorioz, azken sei urtetan, 153 langile hil dira, estatistika ofizialetetan agertu ez arren. Lanaren Nazioarteko Erakundearen arabera, gaixotasun profesionalek lan istripuek baino sei bidar heriotz gehiago eragiten dute”.
LABek lan osasuna eskubidea izan dadin borrokatzen jarraituko duela agertu du, “horretarako egin dezakegun borrokarik onena prekarietatearen aurkako borroka indartzea dela ulertzen dugu, eta horrekin batera lantokietan prebentzio neurriak exijitzeko ekintza sindikala indartuko dugu”.
Mobilizazioa portuko biribilgunean amaitu da
Lan Osasunaren Nazioarteko Eguneko mobilizazioak, Ondarroan
