Antxoa euskal kostaldetik gertuago harrapatu dute
Ondarroako Kalare Deuna kofradiak igorritako datuen arabera, egunotan 500 tona antxoa baino gehiago saldu dira kofradiako bentan.
Aurreko astean Bilbo eta Santander (Kantabria, Espainia) aldean harrapatu zuten arraina, eta ontzi asko, hango uretan ibili badira ere, egunotan, euskal kostaldetik gertuago azaleratu dira antxoa sardak, eta hortaz, ontzi gehienak Ondarroa eta inguruko uretara bueltatzea erabaki dute.
Martitzenean [maiatzak 10], esaterako, Ondarroatik nahikoa gertu itsasoratu ziren hiru ontzik zortea izan zuten, eta antxoa gutxi harrapatu bazuten ere (350 bat kaxa), goizeko bentan nahikoa prezio onean saldu zuten, kiloa, 5 bat euroan. Berria azkar zabaldu zen arrantzaleen artean, eta gehienak, Lekeitio eta Mutriku aldera bueltatu ziren.
Arratsaldean ontzi asko hasi ziren porturatzen, eta iluntzean, arrantzaleen joan-etorria handia zen Egidazu kaian; guztira, 230.000 kilo antxoa porturatu zituzten. Arratsaldeko lehen bentetan saldu ziren aleak nahikoa garesti saldu baziren ere, orduak aurrera joan ahala prezioak amiltzen joan ziren. Kiloa, bataz beste, 1,59 euroan saldu zen.
Eguaztenean [maiatzak 11] ere, antxoa asko lehorretu zuten Ondarroan; 285.000 kilo inguru. Arraina bentan zer edo zer merkeago saldu zen atzo; kiloa, bataz beste, 94 zentimoan.
Gaur [maiatzak 12], ordea, arrantzaleek goizaldean egindako sarekadetan antxoa gutxi harrapatu dute, eta goizeko bentetan antxoa kaxa bakar batzuk saldu dira. Eskaintza txikia izan denez, prezioek gora egin dute; kiloa 5 euro inguruan saldu da.
Antxoa kostera luzatze aldera hartutako neurria dela eta, bihar [maiatzak 13] ez da bentarik egongo. Hori dela eta, ontzi asko etxera bidean daude.
Arrantzaleak antxoa deskargatzen, gaur goizean, Ondarroako portuan
Antxoa deskargatzen, Ondarroako portuan
