Aurrerak zuzeneko jaitsiera postuak atzean utzita amaitu du denboraldia
Talde ondarrutarrak helburua beteta amaitu du denboraldia. Hasiera batean ezinezkoa bazirudien ere, jaitsiera postu zuzenak saihestea lortu dute Aurrerako nagusiek. “Denboraldia oso txarto hasi genuenez, taldea sailkapen taulako azken postuan egon zen aste luzez. Baina, ekinaren ekinaz, partiduak irabaztea lortu dugu, eta horrekin batera, mailan mantentzeko esperantza ere bai”.
Taldeak hirugarren mailan mantentzeko nahikoa puntu lortu baditu ere, hurrengo denboraldian maila berean jarraitu ahal izango duen ez dago argi oraindik. Erabaki hori, hain zuzen ere, beste euskal talde batzuen emaitzen esku geratzen da. “Asteburuak ekarri dituen emaitzak ikusita amesten jarraitzera goaz. Oraindik ez dakigu datorren denboraldian ze mailatan jokatuko dugun, baina bien bitartean jarrai dezagun amesten”.
Berdinketagaz
Denboraldiko azken jardunaldiari dagokionez, Berioren aurkako neurketa 1-1 berdindu zuten. Aurrera garaipena lortzeko esperantzagaz zelairatu zen Zaldupen, eta nahikoa gol aukera izan bazuten ere, aurkarien atean gola sartzea oso zaila izan zen.
Partida hastearekin batera, Aurrerak gola egin zuen, baina baliogabetu egin zuten, eta hurrengo jokaldian Beriok atzelarien urruntze bat aprobetxatuta, markagailuan aurrea hartzeko aukera izan zuen, 5. minutuan. Gol horren ostean, etxeko taldeak aurreko aldean jokatzea erabaki zuen, eta nahikoa gol aukera izan bazituzten ere, ez zuten donostiarren atean golik egin.
Atsedenaldiaren ostean, Aurrerak golaren bila jarraitu zuen, eta partida bukatzen ari zela, Garmendiak berdinketa lortu zuen, 75. minutuan buruz sartuko golari esker. Partida amaitu aurretik beste bi gol aukera izan zituen etxeko taldeak, baina ez zuten zorte handirik eduki.
Aurrerako jokalariak gol bat ospatzen, artxiboko irudian. Argazkia: Aurrera
