Ugaitz Mugertza Urrezko Aizkorako finaletik kanpora geratu da

2016/05/16

Aizkolari mutrikuarrak Eusko Label Banakako Urrezko Aizkora XIX. Txapelketaren finalaurrekoan lan bikaina egin bazuen ere, ez du finalean parte hartzeko aukerarik izango. Zapatuan [maiatzak 14] Ataunen (Gipuzkoa) jokatutako norgehiagokan, zehatz esanda, Xabier Orbegozo Arria V eta Jon Rekondok lortu zuten finalerako txartela. Norgehiagokari dagokionez, bi zatitan banatuta jokatu zen. Alde batetik, lau aizkolariek abiadura proba egin zuten. Aizkolari bakoitzak 54 eta 60 ontzako enbor bana moztu behar izan zituen. Lanak amaitzen lehenengoa Xabier Orbegozo Arria V izan zen (3:45), eta haren atzetik, Jon Rekondo (4:02), Ugaitz Mugertza (4:03) eta Luis Txapartegi (4:42) izan ziren, hurrenez hurren. Lehenengo zatiko ariketa eta gero, lehen sailkatuak laugarrenarekin neurtu zituen indarrak, eta bigarrenak hirugarrenarekin. Sailkapenak kontutan hartuta, Ugaitz Mugertzak Jon Rekondoren aurka jokatu zuen finalerdiko bigarren zatia.

Ugaitz Mugertza. Argazkia: Eneritz Albizu / Urola Kostako Hitza

Alde batetik, zutik 45 ontzako enbor bat moztu behar izan zuten, eta bestetik, 54 ontzako eta 60 ontzako bina enbor. Lanak amaitzen azkarrena Rekondo izan zen 13:35 denborarekin, eta aizkolari mutrikuarrak ia minutu bat gehiago behar izan zuen lanak amaitzeko, 14:28. Hala, Rekondok lortu zuen finalerako txartel preziatua. Lehenengoaren eta laugarrenaren arteko lehia, aldiz, Arria V.ak irabazi zuen, 16:45 denborarekin. Mugertzak nabarmendu duenez, zorte txarra izan zuen. “Ondo ibili nintzen, eta finalean parte hartzeko ilusio handia banuen ere, ez naiz bertan ariko. Bai ala bai irabazi beharra nuen, baina ez nuen zorte askorik eduki. Bigarren enborrean, esaterako, adar batekin arazoak izan nituen, eta horrekin 15 bat segundo galdu nituen. Galdutako denbora hori berreskuratzea ez zen posible izan, ondo prestatuta nengoen, baina lehia horrelakoa da”. Zapatuan Galdakaon jokatu zen beste finalerdian, berriz, Atutxa II.ak eta Eneko Otañok lortu zuten maiatzaren 28an Azpeitian jokatuko den finalean aritzeko aukera.