Errenta aitorpena euskaraz egiteko hitzarmena sinatu dute, Ondarroan
2015eko errenta aitorpena euskaraz egitea bultzatzeko akordioa sinatu dute entitate finantzariek, aholkularitza zerbitzuek eta Ondarroako Udalak, gaur [maiatzak 24] goizean udaletxean. Akordioa sinatu duten entiteak zortzi izan dira: BBVA, Felix aholkularitza, Fideslan, Kutxabank, Laboral Kutxa, Caixabank, Lagunkor eta Torrealday.
Entitateetako ordezkariak eta udal ordezkariak akordioa sinatzen
Udalak bere aldetik, Errenta Aitorpena, euskaraz deritzon kanpaina abiatzeko konpromisoa hartu du, herritarrek errenta aitorpena euskaraz egiteko zer baliabide dituzten eta errenta aitorpena euskaraz egin dezaten bultzateko. Xede hori lortzeko, hainbat komunikazio ekintza erabiliko dira, besteak beste: etxeko atarietan kartelak eta informazioa zabaldu, sare sozialen bidez aukeren berri eman, hiztegiak herritarrek eskura ipini…
Entitate sinatzaileek ostera, berezoak euskaraz egitera animatu, bezeroei aitorpena euskaraz egiten lagundu, aitorpena euskaraz egiteko eskatu, eta kanpainaren amaieran, euskaraz egindako aitorpenen kopurua eta ehunekoa jaso eta udaletxera bidaltzeko konpromisoa hartu dute.
Goranzko joera
Urtez urte, horrelako kanpainen eraginez, gero eta gehiago dira errenta aitorpena euskaraz egiten duten herritarrak. “Herritar gehiagok aitorpenak euskaraz egin ditzaten, udalak eta errenta aitorpena euskaraz egiten laguntzen duten entitateek hitzarmena sinatzea beharrezkoa ikusten dugu, bien aldeko adostasuna eta nahia adieraziz. Gaur beste urrats bat ematen dugu entitate finantzieroekin eta aholkularitza zerbitzuekin herritarrek errenta aitorpena euskaraz egiteko akordio hau sinatuta”, adierazi du Zunbeltz Bedialauneta alkateak.
Eneritz Basurko euskara zinegotziak eskerrak eman nahi izan die akordioagaz bat egiten duten entitateei. “Ea modu honetara datorren urtera begira euskaraz egindako errenta aitorpenen kopurua igotzea lortzen dugun”.
Errenta aitorpena euskaraz egiteko akordioarekin bat egin dute entitateetako ordezkariak, udal ordezkariekin batera
Ondarroan, esaterako, euskaraz egindako errenta aitorpenen kopuruak gorantz egin du azken urteotan, eta udalaren helburua joera hori mantentzea da. Orain dela bi urte egindako aitorpenen herena baino gehiago ( %35,25) egin ziren euskaraz, eta iaz, ostera, kopuru hori zer edo zer handiagoa izan zen; %39,90. Aurtengo kanpainarako helburua jarrita dago: euskaraz egindako aitorpenen ehunekoa %45era igotzea. “Euskarazko errenta aitorpenen kopurua goranzkoa bada ere, euskararen ezagutza %79,10 dela kontuan hartzen badugu, oraindik ere egiteko handia daukagu”.
Errenta aitorpena egiteko kanpainan gainera, lehiaketa batean parte hartzeko aukera zabaldu du udalak sare sozialen bidez. “Ez da sariketa bat, ariketa interesgarri bat baizik”.
